SYUDAD SANG ILOILO (PIA)– Isa ka symbolic lighting ang ginhiwat sa probinsya sang Guimaras angot sa pagsugod sang 18-day campaign to End Violence Against Women (VAW) sang November 25, 2024.
Ginpangunahan sang Department of Tourism (DOT) Region 6 ang pag-organisar sang kahiwatan kaupod ang gobyerno probinsyal sang Guimaras kun sa diin ginpasiga ang Guimaras Governance Center kag ang Guimaras landmark sa duag nga kahel bilang opisyal nga kolor sang VAW campaign.
Ang ini nga aktibidad nagsanto man sa International Day for the Elimination of Violence Against Women kag may tinutuyo sa pagpasanyog sang ihibalo nahanungod sa kinahanglanon para sa isa ka komunidad nga hilway sa kasingki.
Suno kay Tourism Regional Director Crisanta Marlene P. Rodriguez, ang pagdala sang kampanya sa probinsya ang kabahin sang pagpanikasog sang ahensya agud mapasangkad ang inisyatibo sa rehiyon.
“Among the many highlights of the island is the iconic “IGuimaras” landmark, and enduring favorite for selfies and groufies among tourists. Beyond being a popular tourist attraction, this illuminated landmark will spark public curiosity, serving as a powerful visual statement to initiate conversations on ending VAW,” pahayag ni Rodriguez.
Naangot ang tema sang kahiwatan sa “UNITED for a VAW-Free Philippines” nga may sub-theme “VAW Bigyang Wakas, Ngayon na ang Oras!”. Ini ang nagapanawagan sa mga indibidwal kag institusyon sa paghimo sang aktibo nga bahin sa pagtapna sang gender-based violence.
Sa pihak nga bahin, ginpahayag ni Department of Social Welfare and Development Region 6 Director Arwin O. Razo ang impormasyon nga naglambot sa 2,700 ang kaso sang gender-based violence sa Western Visayas sa nahauna nga quarter sang 2024. Sa ini nga numero, yara sa 92% nga mga kababainhan kag mga kabataan nga babaye ang naging biktima.
Si Razo ang nagaserbe man nga pangulo sang Regional Inter-Agency Committee Against Trafficking and Violence Against Women and their Children (RIACAT-VAWC).
“The time to act is now and we must all rise to the challenge of creating safer, more inclusive communities where violence is no longer tolerated,” sambit ni Director Razo.
Nalakip man sa mga talatapan sang gobyerno nga nagbuylog sa aktibidad amo ang Commission on Human Rights (CHR) Region 6, Philippine Army, kag Guimaras Police Provincial Office.
Madumduman nga ang 18-day VAW campaign nga magatapos sa Disyembre 12 ang kabahin sang inisyatibo nga ginasuportahan sang Philippine Commission on Women (PCW) kag iban pa nga advocacy groups. (AAL/LMLE/PIA Iloilo)
