Mga bag-o napilian nga opisyales sa probinsya kang Antique kaimaw si Senator Loren Legarda. (Litrato: PIA Antique)
SAN JOSE, Antique (PIA) — Ang bag-o gid lang napili-an nga mag opisyales ka probinsya kang Antique nagpahayag kang mga prayoridad nga programa matapos sanda maproklamar kag makabuol kang bag-o nga mandato bilang lideres ka probinsya.
Si re-elected Antique’s Lone District Representative Antonio Agapito “AA” Legarda naghambal nga ana padayunon ang mga social services parehas kang edukasyon kag ikaayong lawas nga ana run ginapatigayon sa probinsya.
Ana man gindayaw ang suporta nga ginatao kang ana bugto nga si Senator Loren Legarda sa pagdara kang raku nga programa kag importante nga proyekto para sa kauswagan kang Antique.
Si Senator Legarda naghambal nga sa bag-o nga mandato nga gintao kang mga Antiqueno kay Congressman AA, makalaum ang katawhan kang tayuyon nga kauswagan para sa tanan.
Magluwas sa pagpasanyog pa gid kang programa sa ikaayong lawas, edukasyon, kag parangitan-an, ana man ginhambal ang mga importante nga proyekto pang-imprastraktura parehas kang Antique Airport sa San Jose de Buenavista, ang Antique Convention Center, ang mga tulay sa Paliwan, Bugasong kag Nasuli-Vilvar sa San Remigio, kag ang Pandan Ecotourism Road.
Sa bahin kang bag-o gid lamang napilian nga gobernardor nga si Paolo Everardo S. Javier, tana magatao man ka importansya sa ikaayong lawas kag edukasyon para sa kaaraydan kang Antiquenos ilabi na ang mga pobre.
Ana man pagataw-an ka importansya ang pagpasanyog kang mga serbisyo kang mga hospital, lakip na ang mga bulong kag laboratory facilities.
Ginpahayag man ni Javier ang pagsuporta sa liderato ni Congressman Legarda ilabi na sa mga programa parehas kang edukasyon.
Ginaduso man ni Javier ang subsidy kang mga kabalayan nga nagagamit kang kuryente halin sa pondo kang “share sa national wealth” kang Semirara Mining sa Caluya.
Samtang si Vice Governor-elect Genevive Lim-Reyes nagpahayag man kang suporta sa liderato ni Javier. (AGP/PSM/PIA Antique)
