SYUDAD SANG ILOILO (PIA) – Nagpasalamat ang mga lokal nga opisyal nga benepisyaryo sang Patient Transport Vehicle (PTV) nga ginhatag sa mga local government units (LGUs) ni Presidente Ferdinand R. Marcos Jr. sang Setyembre 19, pamaagi sa Philippine Charity Sweepstakes Office (PCSO).
Sa idalom sang Medical Transport Vehicle Donation Program sang PCSO, ila ginpanagtag ang 51 ka patient transport vehicles sa nagkalain-lain nga mga syudad kag munisipalidad sang Western Visayas.
Ini ang ginalakipan sang 4 ka yunit sang PTV para sa Aklan, 7 ka yunit para sa Antique, 3 ka yunit sa Guimaras, 18 ka yunit sa Iloilo kag 19 ka yunit sa Negros Occidental.
“Ang benepisyo nga mabaton naton sa PTV ang isa ka dako nga bulig para sa aton nga referral system. Isa man ka dako nga pribelehiyo nga maka angkon man ang banwa sang Culasi sini tungod isa ini ka pinaka importante nga equipment sa bilog namon nga panerbisyo tungod kabuhi sini ang iya ginadala,” siling ni Culasi, Antique Mayor Jose Jeffrey Lomugdang.
Dugang pa niya nga ini makabulig man labi na sa mga nagakinahanglan gid dal-on sa ospital agud sila maka kuha gid sang serbisyo nga ila kinahanglan.
Subong man, nagapalab-ot man Mayor Liecel Mondejar-Seville sang New Lucena, Iloilo sang iya pagpasalamat sa nabaton sang ila banwa nga PTV.
“Salamat gid kay ini nga patient transport vehicle will help our constituencies especially those in need nga mas mangin madasig pa gid ang amon pagrespond sa mga kinahanglanon sang aton mga pasyente, because of this access nga may sakyan na sila dayon,” suno kay Seville.
Naghatag man sang pasiguro si Seville nga ila pagagamiton sing husto ang PTV para sa mga pasyente sa banwa sang New Lucena.
Sa pihak nga bahin, ginpabutyag man ni Passi City Mayor Stephen A. Palmares ang iya kalipay bangud sa liwat nga pagpili sang ila syudad para sa pagpanagtag sang mga proyekto sang Presidente.
“I am very happy that it is not only Passi City but the entire Region 6 benefit from this distribution. This will really help, malaki itong tulong sa amin, sa lokal na pamahalaan, especially transporting patients in going to Iloilo City,” siling ni Palmares.
“Sa ating pangulo, kay President Ferdinand “Bongbong” Marcos Jr., taos-puso po akong nagpapasalamat sa inyo at sa lahat ng agencies, sa PCSO at sa DAR, for having this activity in our city. God bless po at mabuhay ang Bagong Pilipinas!,” dugang pa ni Palmares.
Magluwas sa PTV turnover nga ginhiwat sa Paloma Plaza, Passi City, ginpangunahan man ni Presidente Marcos ang pagpanagtag sang e-titles kag mga certificates of land ownership awards (CLOA) para sa agrarian reform beneficiaries sa lain nga venue sa Passi City. (AAL/AGP/PIA 6)
