TAGBILARAN CITY, Bohol, Jan. 10 (PIA) — Mokabat sa 1,216 ka mag-uuma sa mais gikan sa Cebu, Bohol ug Siquijor ang nakadawat sa ilang fertilizer subsidy gikan sa Department of Agriculture-Central Visayas (DA7) sa miaging tuig (hangtod sa Disyembre 2022), nga adunay kinatibuk-ang kantidad nga P 2.423 milyones.
Gipondohan ubos sa Corn Program sa DA, ang matag mag-uuma sa mais nakadawat og P2,000.00 nga kantidad sa inorganic fertilizer voucher ug gi-claim on-site ang katugbang nga gidaghanon sa mga abono gikan sa mga accredited fertilizer merchant, nga anaa sa palibot atol sa aktuwal nga pag-apod-apod sa voucher.
Sa 1,216 ka corn beneficiaries, 722 ang gikan sa Cebu, 318 sa Bohol ug 176 sa Siquijor.
Ang kataposang bahin sa voucher distribution adto sa Negros Oriental nga himuon karong umaabot nga mga buwan.
Ang mga kwalipikado nga mga benepisyaryo sa mais mao ang mga tiggamit sa NSIC-registered corn varieties, mga miyembro sa corn clusters, nga narehistro sa Registry System for Basic Sector in Agriculture (RSBSA) ug kansang mga ngalan makita sa National Farmers’ and Fishers Registry System. (ECB/PIA7 Bohol)
