LINAMON, Lanao del Norte (PIA) — Aron mapalig-on ang seguridad sa pagkaon ug mapadayon ang pag-uswag sa agrikultura, gipahigayon sa Provincial Agriculture Office (PAgrO) ang Farmers’ Field Day ug Farm Walk sa Mindanao Rice Agricultural Innovation Center (MIRAIC) nga nahimutang dinhi sa lungsod.
Gitambongan kini sa 10 ka municipal agriculturists ug 20 ka mag-uuma sa upland rice ug 20 ka mag-uuma sa mais nga gikan sa mga lungsod sa Bacolod, Balo-i, Kauswagan, Linamon, Matungao, Munai, Pantao Ragat, Poona Piagapo, Tagoloan, ug Tangcal.
Gipasiugda sa kalihokan ang mga bag-ong teknolohiya sa pagpanguma nga makatabang sa mga mag-uuma nga mo-adopt og climate-resilient nga variety sa humay ug mais.
Matod ni Mechelle Merambel, provincial rice coordinator, ang ilang adaptability trial sa hybrid rice TH82 nagpakita og positibong resulta, diin kini nakaproduce og 4.32 metric tons o 87 ka sako matag ektarya, nga mas dako kumpara sa tradisyonal nga upland rice nga nag-ani lang og 50 ka sako matag ektarya.
“Kaning activity karon, isa ra sa una o beginning nga tabang sa atong mga mag-uuma para mo-adapt sa bago nga teknolohiya, labi na sa upland rice production, nga mas maka-boost pa ug makatabang sa food security sa probinsya,” matud niya.
Namahayag usab si Provincial Board Member Reinario Bihag, chairperson sa Committee on Agriculture, nga kinahanglan mapalapdan ang pagpanguma sa upland rice tungod sa nagkadugay nga pagkunhod sa production area sa mga basakan sa Lala ug Kapatagan tungod sa komersyalisasyon.
“Naghimo ta og usa ka techno-demo farming diri to encourage our farmers sa upland area to plant rice and augment the losses nga nahitabo didto sa ubos,” sumala niya.
Busa, gidayeg sa mga mag-uuma ang maong programa. Si Amruding Talib, usa ka mag-uuma sa Tagoloan, nagpaambit nga nagduhaduha siya sa hybrid rice tungod sa mga istorya sa uban, apan pagkahuman sa pagtanom, nakita niya nga kini tinuod nga namunga.
“Karon kay nakita nako nga naa gyud namunga, so nalipay gyud ko. Nakaingon ko nga magtanom ta kay mamunga. Mao na, nagpasalamat ko nga naapil mi ani. Dako kaayo ni nga tabang para kanako nga usa ka mag-uuma,” sumala niya.
Samtang si Leoncio Sibay, usa ka mag-uuma sa Bacolod, nagpasalamat sa padayon nga suporta sa probinsya, ilabi na sa ilang nadawat nga rice ug corn mill nga gisugdan na nila ang operasyon. (LELA/PIA-10/Lanao del Norte)
