CEBU CITY — Anaa sa trayntay tres (33) ka mga agrarian reform beneficiaries (ARBs) sa lalawigan sa Sugbo ang nakadawat sa kinatibuk-ang 26.53 ka ektarya nga agricultural lands gikan sa Department of Agrarian Reform (DAR).
Ang mga yuta nga gipang-apod-apod gikan sa mga lungsod sa Barili, nga naglangkob sa 12.68 ka ektarya nga giapod-apod ngadto sa 11 ka ARB; lungsod sa Badian, nga adunay 7.27 ektarya ngadto sa 14 ka ARBs; ug Argao, nga adunay 6.58 ektarya ngadto sa walo (8) ka ARBs.
“Nalipay kaayo mi nga nadawat na namo ang mga titulo sa yuta sa mga properties nga gitikad sa among mga katigulangan sa daghang katuigan. Daghang salamat sa DAR,” matod ni Nick Manigos, usa sa mga recepient nga naggikan sa lungsod sa Barili.
Kini nga aktibidad subay sa direktiba nga gimando ni Presidente Ferdinand R. Marcos Jr., ngadto kang DAR Secretary Conrado Estrella III, nga mapadali ang pag-apod-apod sa mga yuta ngadto sa mga mag-uuma nga walay yuta.
Si Provincial Agrarian Reform Program Officer II Grace Fua, nipahalipay sa mga mag-uuma ug nipahinumdom sa ilang mga responsibilidad ug obligasyon sa ilang pagdawat sa mga yuta nga gihatag kanila sa gobyerno.
“Hinumdomi kanunay nga aduna kamuy responsibilidad sa pag-ugmad sa mga yuta nga gihatag kaninyu. Ang DAR mohatag kaninyu sa gikinahanglang suporta aron mahimong produktibo ang inyung mga umahan,” ang opisyal miingon.
Gidasig usab ni Fua ang mga mag-uuma sa pag-apil sa mga organisasyon sa ARB aron nga makapahimus sa mga nagkalain-laing serbisyo ug suporta nga gitanyag sa ahensya pinaagi niining mga organisasyon. (PR)
Ang Department of Agrarian Reform nag-apod-apod sa mga titulo sa yuta sa mga lungsod sa Barili, nga adunay 12.68 ka ektarya ngadto sa 11 ka ARB; Badian, nga adunay 7.27 ektarya ngadto sa 14 ka ARBs; ug Argao, nga adunay 6.58 ektarya ngadto sa walo ka ARBs. (DAR)
