SAN JOSE, Antique (PIA) — Ang mga mangunguma nga katapo kang NICS (Nasuli, Iba, Casay and San Francisco) Multi-Purpose Cooperative nakabaton kang P3 ka milyon nga kantidad kang proyekto sa pagsagod kang kanding ukon goat raising project halin sa Department of Agriculture (DA).
Lakip sa amo nga proyekto ang pagtao kanada ka 27 ka bilog nga kanding, gamit sa pagpreparar kang kumpay, bulong, pagkaon kag suplemento, kamalig, turil , kag iba pa nga kinahanglanon ka proyekto.
Para mahanda ang mga pastuhan kag mapasiguro nga handa man ang manugsagod kang kanding, ang Office kang Provincial Veterianrian naghiwat kang paghanas nga “forage planting and management” ukon magpananum kag mentinar kang kumpay kang kanding.
Gintaw-an man sanda kang binhi kag gutok kang mga kumpay nga halin sa DA Research Outreach Station (ROS) sa Brgy. Igbobon, Patnongon, Antique.
Suno kay ProVet Supervising Agriculturist Francisca Huele, ang dya nga lihuk kabahin kang DA National Livestock Program – Livestock Economic Enterprise Development (LEED) Program nga gindisenyo para buligan ang mga magagmay nga mangunguma sa pagasagod kang kasapatan.
Sa bahin ni Provincial Veterinarian Florencio Macuja, tana nagpaabot kang suporta sa dya nga proyekto bilang pagkilala kang importante nga papel kang mga nagasagod kang kasapatan sa seguridad kang pagkaun.
Magluwas sa NICS Multi-purpose Cooperative, ang San Jose Multi-purpose Cooperative nakabaton man kang amo nga proyekto nga nahamtang duman sa Brgy. Cansadan, San Jose de Buenavista.
Nagalaum si Macuja nga ang dya nga mga proyekto makabulig kang bahul sa seguridad sa pagkaon kag ekonomiya kang probinsya. (AGP/PSM/PIA Antique)
