SAN JOSE, Antique (PIA) — Ang mga mangunguma nga myembro kang Masanag Farmers Irrigators Association nakabaton kang programa para sa rehabilitasyon kang anda Small Diversion Dam halin sa Department of Agriculture (DA).
Tinutuyo kang dya nga proyekto nga buligan ang mga mangunguma makaagum kang tayuyon nga patubig sa anda taramnan ilabi na gid sa ti-on kang tag-irinit.
Suno kay Salvacion Verde, sangka farmer technician kag presidente kang nasambit nga asosasyon, ang dya nga proyekto nakabulig gid kananda ka bahul kang nagligad nga binulan tungod bisan mainit ang panahon kag limitado ang patubig sa iba nga lugar, bastante tana ang tubig halin sa amo nga irigasyon.
Ginhambal ni Verde nga tungod sa rehabilitasyon kang anda small diversion dam, ang mga mangunguma nakaprodukto ka mayad sa anda pananom parehas kang paray, mais, laswa, kag iba pa nga pananom.
Ang dya nga dam ginpatukod pa katong dekada ‘90 pero nakasakop lamang sa magamay nga lote kag limitado nga numero kang mangunguma.
Pero kang dya ginpakid-an nga nagligad nga tuig, dya nakabulig sa mga 25 ka mangunguma kag sa masobra 30 hektarya nga taramnan.
Suno kay Verde, ang dya nga proyekto katumanan sa buhay run nanda ginahandum nga progreso sa pagpanguma.
Samtang, si Provincial Agriculture and Fisheries Council (PAFC) Chair Arnold Balangao naghambal nga magluwas sa amo nga proyekto sa Hamtic, ang parehas nga rehabilitasyon ka dam sa irigasyon gin-implementar man sa Abiera, Sebaste Antique nga natapos man kang nagligad nga tuig.
Ang dya nga proyekto ginagamit nga patubig sa 15 ka hektarya nga taramnan kang mga miyembro ka Aguila Sebaste Farmers Association.
Bilang Chair ka PAFC, si Balangao nagpasalamat gid sa DA sa pagtao importansya sa mga kanahanglanon ka mga magagmay nga mangunguma. (AGP/PSM/PIA Antique)
