SAN JOSE, Antique (PIA) – Nakabaton kang kapin P1.5 milyones nga balor kang farm machineries and equipment (FME) ang Lugta Agrarian Reform Beneficiaries Association (LARBA) sa Laua-an, Antique.
Ang FMEs ginalakipan kang darwa ka rice thresher, apat ka hand tractor nga may trailer, kag apat man ka bubon nga may water pump engines kag accessories.
Sa anang mensahe sa ginhiwat nga turnover ceremony, gintugruan igtalopangod ni Provincial Agrarian Reform Program Officer (PARPO) II Florentino Siladan ang mga inisyatibo kang gobyerno sa pagpahagan-hagan kang mga epekto kang climate change.
Hambal ni Siladan, ang pagtugro kang mga kagamitan pang-agrikultura sa mga mangunguma ang sara sa mga sabat kang gobyerno sa mga epekto kang nagalala nga krisis sa klima.
Ana man gin-agda ang mga benepisyaryo nga halungan kag gamiton mayad ang mga kagamitan kag support facilities para magamit sa mas buhay nga panahon.
Samtang, bahol ang pagpasalamat ni LARBA President Filamie B. Del Rosario sa DAR para sa padayon nanda nga bulig kag suporta para sa mga Antiqueño nga mangunguma. (AGP/BPS/PIA Antique/ DAR Antique)
