SYUDAD SANG ROXAS, Capiz (PIA) — Ginpasangkad pa sang Department of Science and Technology-Philippine Atmospheric, Geophysical and Astronomical Services Administration (DOST-PAGASA) kag Bureau of Fisheries and Aquatic Resources (BFAR) ang ihibalo sang mga mangunguma sang pakinhason ilabi na sa pagprodukto sang talaba kag tahong sa probinsya.
Ini paagi sa isa ka participatory workshop nga ginpatigayon sang mga ahensya nga may tema nga “Collaborative Development of Knowledge Product for Oyster Farming Community” sa San Antonio Resort sa Roxas City.
Tinutuyo sang duha ka adlaw nga workshop nga mas pasangkaron ang ihibalo sang mga manug-talaba kag manug-tahong sang probinsya kag maprotektahan ang industriya batok sa epekto sang climate change kag red tide.
Lakip sa mga nagtambong ang mga miyembro sang Basiao Oyster Farmers Association (BOFA) sa banwa sang Ivisan, kag ang Lonoy Agrarian Reform Cooperative (LARC) sa banwa sang Sapian.
Suno sa DOST-Capiz, pinaagi sa workshop, nakadihon sang konkreto nga risk management plans ang mga partisipante kung paano mapahagan-hagan ang negatibo nga epekto sang tama ka init nga panahon na pagpadako sang talaba kag tahong.
Ginpakita man sang mga tiglawas sang DOST-PAGASA kon paano ang husto nga pag-interpretar sang mga weather forecast indi lang para sa disaster management, kundi bilang isa ka innovative kag importante nga instrumento sa industriya sang aquaculture. (AGP/PLF/PIA Capiz)
