DUMAGUETE CITY, Negros Oriental (PIA) — Mapadali ang pagbayad sa mga transaksyon sa Dumaguete City Public Market ug sa Dauin Mega Market human buksan sa Bangko Sentral ng Pilipinas (BSP) – Dumaguete Branch ang Paleng-QR system didto.
Makita sa matag pwesto sa merkado ang mga QR-PH code sa nagkadaiyang payment channel nga partner sa BSP sama sa GCash, Maya, ug Palawan Pay.
Kinahanglan lang i-scan sa mga konsumedor ang QR-PH code gamit ang ilang cellphone o basig unsang mobile device na naay internet aron direkta sila makabayad sa merchant pinaagi sa digital payment gikan sa ilang e-wallet.
Tumong sa maong programa na mapaambit ang adbokasiya kalabot sa digital transformation ug maengganyo ang mga consumer ug mga manindahay sa paggamit og modernong paagi sa pagbayad sa mga transaksyon.
Gipanguluhan sa mga opisiyal sa BSP sa Rehiyon 7 ug Dumaguete City Mayor Felipe Remollo ug Dauin Mayor Galicano Truita ang pagbukas sa maong programa sa ilang mga merkado.
Gipadayag ni BSP Region 7 director Anna Clara Oville ang mga kaayuhan sa maong programa.
“The technology we are using for the QR-PH program a game-changer. It makes daily transactions convenient, safer, and cost-effective. Pinaagi sa atoang QR Ph makabayad na kita sa ensaktong kantidad. Dili na ta magkalipong-lipong mangita og sinsilyo. Pinaagi (pod) sa pagbayad gamit ang QR PH malikayan ang posibleng pagkuyanap sa virus gumikan sa pagkupot sa physical cash especially kanang prone kaayo ang mga old money,” matod ni Oville.
Gipadayag usab ni Dumaguete City Mayor Felipe Remollo na maayo kaayo ni kay kinahanglan mag-innovate ang mga manindahay sa merkado aron mapadayon ang ilang mga negosyo sa karon panahon na mogamit na og makabag-ong teknolohiya sa pamalit og pagbayad sa nagkadaiyang goods and services.
“Because of changes in technology we have to adopt kay kon dili ta mo-adopt, mabiyaan ta,” matod ni Remollo.
Unang gibuksan sa painitan section sa Dumaguete City Public Market ang Paleng-QR system ug isunod pod ang ubang section sa maong merkado.
Nakasabot ang mga manindahay sa merkado sa Dumaguete sa kaayuhan dala sa maong programa.
“Okay gud siya kay kato wala mga cash didto lang sila sa GCash mobayad. Okay ra man siya dali naman pod basta kabalo na ka daan. Mas secured gud nimo ang kwarta,” matod ni Joric Andayao, usa sa mga naninda og pagkaon sa painitan sa Dumaguete City Public Market.
“Mao pod na nakachada. Dili na ka magkinahanglan sukli pa. Dili n aka ma-hassle makita og ikasukli. Okay man pod,” dugang sab ni Mariel Basa na namaligya sab og kalan-on sa may painitan.
Nakatabang sab ang pagtaod og free Wi-Fi gikan sa Department of Information and Communications Technology sa duha ka merkado alang sa pag-roll out sa Paleng-QR system didto. (RAL/PIA7-Negros Oriental)
