SYUDAD SANG ILOILO (PIA) — Nagtilipon ang mga miyembro nga ahensya kag iban pa nga partners sang Regional Council Against Child Labor (RCACL) sa Western Visayas bilang pagpakita sang suporta sa pagtapna sang child labor sa pungsod paagi sa ginpatigayon nga Information and Service Caravan on Child Labor Prevention and Elimination nga programa kag ILO Convention 190 or Violence and Harassment Convention 2019 Signing of Commitment diri sa syudad sang Iloilo sang Pebrero 20.
Ang ini nga mga ahensya kag tagsakdag sa rehiyon ginpabakod ang ila ginsumpaan nga pangako batok sa child labor nga nagasuporta sa mga panikasog sang Department of Labor and Employment (DOLE) sa pagsakdag sang mga kinamatarong kag kaayuhan sang kabataan nga nagahatag sa ila sang madamo nga mga oportunidad para mag-uswag, kag magadul-ong sa ila sang kahilwayan pang-ekonomiya.
Sa ngalan ni DOLE Secretary Bienvenido E. Laguesma, ginhatag ni Bureau of Workers with Special Concerns OIC-Director Leilani Reynoso ang keynote message nga nagapatpat sa importansya sang aktibidad.
“Ang Philippine Program Against Child Labor ay ibinalangkas alinsunod sa Philippine Development Plan at Labor Employment Plan 2023-2028 na magpatupad ang pamahalaan ng isang holistic approach at siguraduhin na may sapat na programa at polisiya upang maprotektahan at masuportahan ang mga sektor na may higit na pangagailangan kabilang ang child laborers at kanilang pamilya,” pagpa-athag ni Reynoso.
Samtang, si DOLE 6 Assistant Regional Director Melisa S. Navarra nagpabutyag sang pagpasalamat sa tanan nga mga kaupod sang DOLE, kon sa diin iya ginsambit nga ang ila presensya amo nagapamatuod sang ila pangako nga mas pasangkaron ang ila mga serbisyo para sa mga profiled child laborers, subongman sa pagpasanyog sang ihibalo kag pagtipon sang suporta batok sa child labor.
“Childhood is an important and integral part of our life- it is the most fun and memorable time in anyone’s life. In childhood, dreams are built as it is the foundation of a child’s future. It is where the children should be developed by providing their needs and giving them proper education,” siling ni Navarra.
Iya man ginsambit nga ang highlight sang kahiwatan amo ang pagpirma sang commitment sa ILO Convention 190 ukon Violence and Harassment Convention 2019.
“Convention 190 recognizes the rights of all workers whether in formal and informal setting, regardless of classification and inspective employment status, to a world of work free from violence and harassment,” dugang ni Navarra.
Dugang pa, ginhatagan sang access ang pila ka mga partisipante sa nagkalain-lain nga entrepreneurship programs pinaagi sa pagpanagtag sang livelihood check sa mga ginikanan sang mga child laborers gikan sa Brgy. Sapal, San Lorenzo, Guimaras.
Ang mga serbisyo nga dungan gintanyag man nga libre amo ang mga serbisyo medikal kag dental, pagproseso sang mga clearance kag ID, mga pampering services kaangay sang pag-utod sang buhok, pagmasahe, nail care, pagpakita kag pagpanagtag sang mga information materials kag iban pa nga mga hilikuton ukon mga hampang para sa mga kabataan.
Sa idalum sang “Project Angel Tree,” ginpatigayon man ang seremonyal nga pagpanagtag sang mga gamit sa eskwelahan, partikular ang mga bag nga may unod nga nagkalain-lain nga school items para sa mga child laborers gikan sa nagkalain-lain nga distrito sang syudad sang Iloilo.
Ang ini nga mga hilikuton nagatuyo nga ipakita ang pangako sang departamento kaupod sang mga tagsakdag nga nakasentro sa kaayuhan sang mga kabataan kag pagtapna sang child labor sa pungsod. (AAL/AGP/PIA 6)
