SYUDAD SANG ROXAS, Capiz (PIA) — Nagbaton sang P15,000 ang kada isa sa 82 ka mga kwalipikado nga benepisyaryo sa ginpatigayon nga “payout” sang Department of Human Settlements and Urban Development sang Hulyo 5 sa Dinggoy Roxas Civic Center diri sa syudad sang Roxas.
Ang mga benepisyaryo ang nasunugan sadtong Pebrero 27 sa may Barangay 7 kag karon naga-istar na sa Tanza Ville sa Brgy. Tanza, Roxas City.
Ang bulig pinansyal nga ginpangunahan panagtag ni direktor Eva Maria Marfil sang DHSUD 6 ang kaangot sang Integrated Disaster Shelter Assistance Program – Emergency Shelter Support sang ahensiya nga isa ka one-time unconditional shelter assistance para sa mga natumod nga mga may totally-damaged houses agud nga mabuligan sa ila mga maistaran nga kinahanglanon pagkatapos sang kalamidad.
Samtang, ginpaabot naman ni Mayor Ronnie Dadivas sang syudad sang Roxas ang pagpasalamat kay Pangulong Ferdinand Marcos, Jr. kag DHSUD Sec. Jose Rizalino Acuzar bangud sa bulig sa mga pamilya nga nasunugan.
Subong man, iya ginpasalamatan si direktor Marfil, Engr. Juvy Tabaranza nga hepe sang Roxas City Local Housing Unit, Marites Pimentel nga Support Service Officer sang Roxas City Local Housing Unit, Punong Barangay Nilo Diestro sang Barangay 7 bangud sang pagpatigayon sa katumanan sang bulig pinansyal.
Sa iya nga bahin, ginpahayag ni Eric Antioquia nga benepisyaryo sang IDSAP-ESS nga ang kantidad ang iya pagagamiton sa pagpundar sang ila pangabuhi kaupod sang iya asawa kag isa ka tuig kag pito ka bulan nga anak.
Ginpasalamatan man ni Antioquia ang lokal kag nasyonal nga gobyerno sa mga bulig nga nabaton ilabi na ang yunit sang balay nga ila nabaton mga isa ka semana matapos ang sunog.
Ang paghatag sang IDSAP-ESS sa mga nasunugan sa Roxas City ang ikaduha na sa rehiyon bangud kapareho man nga bulig pinansyal ang ginpaabot sang DHSUD 6 sang nagligad nga Hunyo para sa mga nasunugan sa Brgy. Airport sa Mandurriao sa Iloilo. (AGP/AAL/PIA Capiz)
