SAN JOSE, Antique (PIA) — Nagtipon-tipon ang mga magagmay nga negosyante kag stakeholders sa dya nga probinsya sa selebrasyon kang Micro, Small, and Medium Enterprises (MSME) Week kang nagligad gid lamang.
Sa pagselebrar kang MSME Week, naghiwat ang Department of Trade and Industry (DTI)-Antique kang Provincial MSME Summit para tugruan ang mga lokal nga negosyante kang access sa networking kag partnerships para mapamayad andang pagnegosyo.
Sara sa mga stakeholders nga nagtambong sa Summit amo ang Department of Science and Technology (DOST) nga ginpakigbahin andang mga programa kag teknolohiya sa pagpasanyog kang competitiveness kag productivity kang mga negosyo.
Dyan man ang Land Bank of the Philippines (LBP) kag Small Business Corporation (SBCorp) nga nagtugro kang impormasyon sa andang mga loan programs.
Sa anang mensahe sa aktibidad, ginkilala ni Department of Trade and Industry (DTI)-Antique Provincial Director Mutya D. Eusores ang kooperasyon kag suporta kang nagkalain-lain nga mga ahensiya kang gobyerno sa pagdara kang mga serbisyo sa mga MSME.
Bangod sa aktibo nga pagpakigbahin kang mga MSME kag stakeholders, ginkalipay ni Eusores ang madinalag-on nga paghiwat kang pinaka-una nga Provincial MSME Summit sa Antique.
Sa bahin ni DTI-6 Business Development Division OIC-Chief Therese Grace Marla, ana ginpabutyag ang dedikasyon kang andang ahensya sa pagsiguro kang kauswagan kang mga MSME.
Kabahin kang Provincial MSME Summit ang pagkilala sa pito ka mga modelo nga negosyo paagi sa Bagwis Award 2023, kag paghiwat kang “Tindahang Lokal” trade fair sa Old Provincial Capitol sa banwa kang San Jose de Buenavista. (AGP/PSM/BPS/PIA Antique)
