KALIBO, Aklan (PIA) — Ginpahibalo ro masobra 30 ka mga opisyales sa nagkasari-sari nga barangay it Nabas sa probinsya it Aklan hanungod sa mga programa ag serbisyo it gobyerno paagi sa community-based communication program nga ginatawag nga “Hinun-anon sa Barangay” ana it Philippine Information Agency (PIA).
Sa makarang dag-on, ginpangunahan it PIA Aklan, kapartner ro Aklan Public Information Officer Association (APIOA) ro Hinun-anon sa Barangay.
Euwas sa paghatod it mandato sa pagtao it naga igsakto sa oras, nagakaigo, tama ag matuod nga impormasyon, raya nga inisyatibo hay nagatuyo man nga makahimo it isaea ka eubos nga may kaaeaman ag kahayagan nga komunidad.
Ginpaathag it mga manughambae halin sa SSS, Philhealth ag PSA sa mga partisipante ro anda nga mga nagakasari-sari nga programa, serbisyo, ag inisyatibo it anda nga ahensya, kung siin raya hay importante sa kada Pilipino.
Ginkosiderar man ni Nabas Mayor Maria Fe Lasaleta nga ro Hinun-anon hay isa mga importanteng mga aktibidades nga raya hay makatao it dugang nga kasayuran sa mga pumueuyo sa mga nagakasari-saring programa ag serbisyo it gobyerno.
Ginpadumdom nana sa mga opisyales it barangay ro andang importanteng papel sa pagpaeapnag it mga mga impormasyon sa andang mga nasaeakpan, eabi na gid sa mga programa, proyekto, polisiya, ag serbisyo it gobyerno, dahil sanda ra ro pinakanauna ag pinakamaeapit sa mga tawo, pamilya, ag komunidad.
Si Social Insurance Officer III ag information officer Aimy Joy M. Desaporado it Philhealth-Aklan, naghambae hanungod sa andang serbisyo, kapin na gid parte sa Konsulta Benefit Package ag ro kinahang-ean kara nga raya hay mapaabot sa grassroots level.
Gin-anunsyo ni Desaporado nga ru Aklan hay isaea sa ap-at ka mga probinsya sa Pilipinas nga hapilian bilang isaeang ka pilot site para sa Health Care Provider Network (HCPN).
Dugang nana nga raya nga tikang hay eagko ro mangin benepisyo sa health system it probinsya, nga kung siin mas mapabaskog pa gid ro mga primary health care provider, ag makabulig nga malikawan ro pagginutok sa mga ospital.
Gin-imporma man ni Chief Executive Officer II Rey Mark V. Casaquite it SSS-Kalibo, ro mga partesipante hanungod sa andang ahensya.
Gin-eksplikar man ni Casaquite nga ro SSS hay bukon eamang para sa retirement o pensyon, kundi mas abo pa nga benepisyo para sa mga myembro halin sa pagnabdus asta sa eoeubngan, kaparehas it benepisyo sa pagnabdus, pagmasakit, pagkabalda, pagkaduea it trabaho, ag pagkamatay.
“Ro pinakahandum it SSS hay owa it Pilipino nga mangin pabug-at sa sosyudad,” hambae ni Casaquite.
Sa pihak nga bahin, Si information officer Niña Faye R. Culajara it Philippine Statistics Authority-Aklan nagpahisayod sa mga partisipante nahanungod sa Philippine Identification System ukon PhilSys nga mas kilalaea sa tawag nga “National ID.”
Halin man gihapon sa PSA-Aklan, si Registration Officer II Glenda S. Sampaton mat – a hay nagtsorya hanungod sa bag-ong proseso it Civil Registration System, ag mga updates sa andang programa kaparehas ku Barangay Registration Assistance Project, ag mga free civil registration nga mga dokemento kaparehas it birth ag marriage certificates para sa mga first-time job seekers.
Ana man nga ginpadumdom ro mga nagtambong nga ro PSA-Aklan hay naga implementar it Online Appointment System, nga kung siin kinahangean gid it mga nagabuoe it dokumento nga magpa appointment gid anay sa https://appointment.psa.gov.ph/ bago mag-agto sa PSA-outlet. Ro mga walk-in hay indi pagabatunon.
Samtang, si Nabas information officer ag hepe it MDRRMO Reynard Dela Cruz, gin-imporma ro mga nagtambong hanungod sa presenting sitwasyon it banwa sa epekto it El Niño phenomenon, kaibahan ro mga inisyatibo ag tikang nga ginhimo ag pagahimuon it lokal nga gobyerno para masuk-ean o mahagan-hagan ro epekto it El Niño.
Nag-apela man si Dela Cruz sa mga opisyales it barangay nga magsumiter it andang mga report sa tama nga oras agud ro lokal nga gobyerno hay makahimo man dayon it nakaigo nga tikang para marespondehan ro mga kinahangeanon it mga tawo.
“Kinahangean namon ro data sa inyong mga barangay. Kung ingkaso makabaton kamo it mga report halin sa mga pumoeuyo nga ro andang mga pananom hay nasamad ag ru andang mga taeamnam hay nagmaea, ginahinyo gid namon nga inyo raya ireport kamon. Kinahang-ean ron namon nga maipasa man sa mga nakaigo nga mga ahensya,” dugang nana.
Ginpaambit man nana ru paaeabuton nga first Municipal “Rescuelympics” ag ro pag-istablisar it Barangay Information Officers (BIOs) sa banwa, kung siin importante raya para mapaumwad man ro serbisyo sa mga grassroots level.
Isaea man ka caravan it serbisyo it gobyerno para sa mga Nabasnon ro gindaea ag gintao it mga nagpartisipar nga mga ahensya sa hinun-anon.
Gindaea it SSS ro andang “SSS on Wheels” nga nagtao it mga masunod nga mga serbisyo: Issuance of Social Security Number; Registration and Account Resetting; Payment Reference Number (PRN) Generation; Receiving of Member Data Change Request (E-4); Contribution and Loan Verification and Inquiries; Annual Confirmation of Pensioner (ACOP); Pension Loan Application; Loan Restructuring Application; ag Disbursement Account Enrollment.
Nagbaton ro PSA it mga nagrehistro sa National ID para sa isaeang anyos pataas, PhilID Issuance, TRN Retrieval, ag mga pangutana parte sa civil registration.
Ro Philhealth mat-a ag ro Nabas Municipal Health Office hay nagpangbaton it mga nagrehistro para sa Konsulta. (AGP/SQP/PIA Aklan)
