SYUDAD SANG ILOILO (PIA) — Lima ka mga ospital nga ginadumalahan sang gobyerno probinsyal ang ginkilala sang Department of Health (DOH) Western Visayas Center for Health Development tungod sa ila outstanding commitment sa mga lihok tuhoy sa green and safe healthcare.
Nalakip sa mga ospital nga ginpasidunggan sa Regional Awarding of Partners and Stakeholders amo ang Aleosan District Hospital, Dr. Ricardo S. Provido Sr. Memorial District Hospital, Iloilo Provincial Hospital – IPH , Rep. Pedro G. Trono Memorial Hospital, kag San Joaquin Mother and Child Hospital.
Nakaagom ang kada ospital sang Five Green Star Rating sa idalom sang Green Viability Assessment System sang DOH tuhoy sa pinasahi nga pagsunod sa environmental sustainability kag mga sulundan sa kaluwasan sang pasyente.
Nangin ehemplo man ang ini nga mga ospital sa pagpatigayon sang mga buhat nga indi makahalit sa palibot kag pagsiguro sang safe healthcare environment. Suno sa gobyerno probinsyal, ini ang nagapakita man sang reputasyon sang Iloilo tuhoy sa pagkaekselente sa pagpatigayon sang serbisyo sa ikaayong lawas sang publiko.
Dugang pa, ginkilala ang Iloilo Hospital Management Office tungod sa ila teknikal nga bulig sa nagkalain lain nga ahensya sa pag-institusyonalisar sang Disaster Risk Reduction and Management in Health sa probinsyal nga bahin.
Ang paghiwat sang ini nga hilikuton nagahatag pagtamod sa mga partnerships sang DOH kag mga local health facilities sa rehiyon, labi man ang pagkilala sa mga hilikuton nga may tinutuyo sa papagpauswag sang mga sulundan sa ikaayong lawas sang rehiyon. (AAL/LMLE/PIA Iloilo)
