ROXAS CITY, Capiz (PIA) — Ang tagsa ka Pilipino ang sarang makapaabot sang suporta sa pagpakigbato sa soberenya sang Pilipinas sa West Philippine Sea.
Ini ang ginpunto ni Commodore Jay Tarriela nga spokesperson sang Philippine Coast Guard sang ma interview sa lokal nga estasyon sang radyo kaangot sa mga ginahimo sang gobyerno nahanungod sa WPS sa pihak sang nagapadayon nga mga iligal nga aktibidades sang China sa nasambit nga area.
Ginpahayag ni Tarriela nga ang mga Pilipino ang sarang maka-komento kag makasabat ilabi na sa mga pagpatalang sa social media nga ginahimo sang China agud nga magpalapta sang sayop nga impormasyon lamang nga makapabor sa ila kaangot sa isyu sa WPS.
“Para sa akon, ini nga approach sa pagsabat sa mga disinformation ang mangin epektibo,” ang pahayag ni Tarriela sa English nga pulong kadungan sa iya pahayag nga ang pagpakigbato kag pagtindog para sa WPS ang isa ka “patriotic duty” ukon pagka makabayan bilang Pilipino.
Samtang, nagpanawagan man ang opisyal sang PCG sa mga Capiznon nga magpili sang mga lokal nga opisyal kag mga miyembro sang Kongreso subongman Senado nga nagasuporta sa pagpakigbato sang WPS pinaagi sa pagduso sang modernisasyon sang Armadong Kusog sang Pilipinas, pagpabakud sa kapabilidad sang PCG, kag madamo nga iban pa sa palaabuton nga pinilian sa Mayo.
“Another very important role na magagawa ng ating mga kababayang Pilipino is to elect leaders who are really willing to stand up and fight for our position on the WPS,” pahayag niya.
Nahibaluan nga magluwas sa mga interview sa media, si Tarriela ang nagalibot sa bilog nga Pilipinas agud nga magbisita sa mga unibersidad, magpakig-istorya sa mga lokal nga opisyal kag nagatambong sa mga pagtilipon sa mga rehiyon agud nga mapahibalo ang publiko nahanungod sa mga lihok nga ginahimo sang gobyerno sa WPS. (AGP/AAL/PIA Capiz)
