TAGBILARAN CITY, Bohol, Jan. 18 (PIA) — Nagpabiling ubos ang gidaghanon sa mga Pinoy nga nakadawat sa ilang COVID-19 booster shot nga anaa lamang sa 27% sa kwalipikadong populasyon, matud pa ni Department of Health (DOH) officer-in-charge Maria Rosario Vergeire adlaw’ng Miyerkules.
Base sa national COVID-19 vaccination dashboard sa DOH, 21.2 milyong Pilipino na ang nakadawat og booster shot niadtong Enero 15 — layo ra kayo sa 73.8 milyon nga hingpit nang nabakunahan batok sa COVID-19.
Apan gipasabot ni Vergeire nga ang pagsaka sa booster uptake sa 27% usa ka kalamboan gikan sa datos sa niaging tuig diin 23% sa angayan nga populasyon lang ang gipakusog.
“Medyo mabagal pa rin po pero at least nagi-improve tayo at sana mas makakapaghikayat pa rin tayo ng ating kababayan na magpabakuna,” pasabot pa ni Vergeire.
“Mababa pa rin po. Talagang nakikita natin ang ating mga kababayan ay medyo back to normal na sila so talagang kami ay hanggang sa ngayon patuloy na naghihikayat sa ating mga kababayan para magpabakuna sila,” dugang pa niini.
Si Vergeire namahayag nga mahimo pa gihapong makuha sa mga Pilipino ang ilang primary vaccine series ug booster shots sa primary care facilities, ospital, ug gibutang nga mga vaccination sites sa mga local government units. (ECB/PIA7 Bohol)
