SYUDAD SANG ILOILO (PIA) – Ginalauman nga mahatagan na sang supply sang kuryente sa labing madali nga panahon ang mga pumuluyo sang pila ka mga island barangays sa Northern Iloilo matapos ang ginhiwat nga ground breaking ceremony para sa P388 milyones nga Estancia-Manlot-Calagnaan-Sicugon Island Submarine Cable Interconnection Project sang Marso 7 sa Brgy. San Fernando, Isla sang Sicugon sa Carles, Iloilo.
Ginpangunahan ni House Speaker Ferdinand Martin Romualdez ang seremonya kaupod sanday Ayala Land director Fernando Zobel de Ayala, fifth district Representative Raul “Buboy” Tupas, fifth district board member Binky Tupas, ILECO III general manager Atty. James Balsomo, kag mga lokal nga lideres sang nagkalain-lain nga local government units (LGUs) sa quinto distrito sang Iloilo.
Lakip sa mga benepisyaryo sang nasambit nga proyekto amo ang mga pumuluyo gikan sa Manlot Island, barangay Barangcalan, Bito-on, Talingting, Tinigban, kag Punta Batuanan sa Calagnaan Island, kag barangay Buaya, Alipata, kag San Fernando sa Sicugon Island.
Ang proyekto nga ginalauman nga makabenepisyo sa masobra 13,000 ka mga panimalay sa nasambit nga mga isla ang ginakabig nga pinakadako nga rural electrification project nga ginpondohan sang 2024 Locally Funded-Total Electrification Project (LFP-TEP) sang Department of Energy (DOE) kag 2011-2022 savings subsidy sang National Electrification Administration (NEA).
Ginapatuman sang Iloilo Electric Cooperative III (ILECO-III) ang proyekto nga nagatuyo nga ma-electrify ang mga isla pinaagi sa submarine cable nga konektado sa mayor nga grid. Nagalakip ini sang pagpalawig sang 13.2KV distribution line halin sa Barangay Dacutan, Estancia, padulong sa tatlo ka isla. Ang extension magagamit sang tatlo ka bahin sang submarine cable agud makahatag sang masaligan nga 24/7 nga suplay sang kuryente sa siyam ka mga barangay sa mga isla.
Samtang, nagpalab-ot naman sang pagpasalamat ang pila ka mga pumuluyo sa gobyerno kag ginpahayag nga madugay na nila nga handom nga makaangkon sang kuryente bangud solar lights kag power generator lang ang ila ginagamit.
“Pasalamat gid kami eh kay hanggod ni nga bulig sa amon pangabuhi kung mahuman na gid. Indi na budlay amon hulag kag makabulig gid ni nga project,” siling ni Junjun Bantillo.
Ginpahayag man ni Queenlyn Acupio nga ang nasambit nga proyekto ang magapabaskog sang ila palangabuhian sa isla, subong man ang pag-eskwela sang ila mga kabataan, ilabi na sa ila pagtuon sa gab-i.
Sa pihak nga bahin, ginhatagan pagtamod ni Romualdez sa iya mensahe nga wala sang dapat mabayaan sa tinutuyo sang gobyerno para sa pag-uswag sang pungsod.
“Sa groundbreaking ceremony na ito, sama-sama tayo sa deklarasyong walang Pilipinong maiiwan sa pag-unlad. Ang P388 million na project na ito ay Hindi lamang Isang proyekto dahil ito ay ilaw ng pag-asa, ilaw ng kabuhayan at ilaw ng kaunlaran para sa mahigit 13,000 na pamilya sa mga islang ito,” siling ni Romualdez.
Ang electrification project nga natalana nga matapos sa sulod sang 170 ka adlaw ang magabulig man sa palangabuhian sang mga pumuluyo nga ang mayor nga ginakuhaan sang kita amo ang pagpangisda, mapauswag ang edukasyon sang mga estudyante sa mga isla, kag mapasanyog ang industriya sang turismo sa lugar. (AAL/JNH/PIA Iloilo)
