SYUDAD SANG ILOILO (PIA) — Ang mga rehiyonal nga opisina sang Bureau of Fisheries and Aquatic Resources (BFAR) sa Western Visayas (Region 6), Central Visayas (Region 7), kag Bicol Region (Region 5) ang nagkasugot nga magtingob sa pagpasangkad sang monitoring kag surveillance activities sa mga fishing areas nga sakop sang Fisheries Management Area (FMA) 11 para pamatukan ang “Illegal, Unreported and Unregulated (IUU)” fishing.
Sakop sang FMA 11 ang Visayan Sea, Guimaras Strait, kag Tañon Strait.
Suno sa BFAR, ang Modified Danish seine ukon mas kilala bilang “hulbot-hubot,” ang madugay na nga may malain nga dulot sa reefs.
Subong man, ang ini nga pamaagi sa pagpangisda ang madugay na nga ginadumilian bangud ini nagadugang sa overfishing kag habitat degradation nga nagahatag sing daku nga kapierdihan sa fisheries resources sang pungsod.
Sa 2018 nga imbentaryo nga ginpatigayon sang BFAR-USAID Fish Right Program, nahibaluan nga may 2,000 ka hulbot-hulbot kag trawl operators sa Visayan Sea nga ang iban yara sa Northern Iloilo kag Northern Negros.
Dugang pa, gamit ang IUU Fishing Index and Threat Assessment Tool sang 2021, nahibaluan man nga may kapin P16 ka milyon kada adlaw ang kantidad sang wala na maisip nga isda bangud sa hulbot-hulbot.
Bangud diri, gindihon ang Fisheries Administrative Order (FAO) nga nagakonsiderar sang pag-angkun sang hulbot-hulbot kag bisan ano sini nga paraphernalia bilang “prima facie” nga ebidensya sang sini nga violation. Buot silingon, ang isa ka tawo mahimo nga makonsiderar nga nakakomiter sang iligal nga akto bangud nga may ara ini nga “prohibited item” sa iya luyo.
Ang mga mangingisda, sa munisipalidad man ukon komersyal nga katubigan nga makita nga nga nagagamit sang Modified Danish seine mahimo nga magapangatubang sang penalidad, lakip na ang kumpiskasyon sang fishing gear, penalidad hasta P2 ka milyon, kag posible nga suspensyon ukon rebokasyon sang ila mga lisensya sa pagpangisda.
Ginhambal ni BFAR Regional Director Remia A. Aparri ang importansya sang Monitoring, Control, and Surveillance (MCS) sa mga munisipalidad kag komersyal nga katubigan.
“Our operational plan for the remaining months of the year will include deploying our floating assets. We have already started this before the pandemic for the Visayan Sea Close Season, now we aim to model this approach for other FMAs as one of our best practices,” siling ni Aparri. (AAL/AGP/PIA 6)
