Nagpang-usisa sa mga service repair sa banwa kang San Jose ang DTI. (Litrato: DTI)
SAN JOSE, Antique (PIA) — Ginahinyu kang Department of Trade and Industry (DTI) ang mga repair shops sa probinsya kang Antique nga magrehistro bilang katumanan sa probisyon kang Presidential Decree 1572 of 1978 ukon Repair and Service Shop Accreditation Law kag Republic Act No. 7394 ukon Consumer Act of the Philippines.
Suno kay DTI Provincial Director Mary Jade Gonzalez, ang accreditation kang mga service repair establishment (SRE) isara sa mga importante nga programa sa consumer protection unit kang DTI.
Gindugang na hambal nga ang accreditation kang SRE isara sa pamaagi agud masiguro nga ang nga repair shops nagasunod sa patakaran nga ginapatuman kang gobyerno.
Si Senior Trade and Industry Development Specialist Arnel Oliveros naghambal nga suno sa PD 1572, ang SRE nga nagakid-an kang motor, ragkul nga trak, kag iban pa nga kagamitan sa konstruksyon kinahanglan gid magparehistro sa DTI.
Amo man ang mga electronic shop nga nagakid-an kang telebisyon, washing machine, electrical products parehas kang electric fans, iron, blenders, rice cookers kag iba pa, air conditioning kag refrigeration, kagamitan sa opisina lakip na ang computers, printers, kag fax machines, mga medical kag dental equipment, kag iba pa nga mechanical kag industrial appliances kag devices.
Ang mga repair shop para sa cellphone sa idalom kang huridikasyon kang National Telecommunication Commission.
Ginhambal ni Oliveros nga isara sa mga kinahanglan para sa anda accreditation, luwas kang mga permits kag business name registration, amo ang nga National Certificate o Certificate of Competency halin sa Technical Education and Skills Development Authority (TESDA) nga nagapakita kang anda pagkasampatun nga pagpangid-an kang kagamitan.
Si Oliveros nagapanawagn sa mga tag-iya kang repair shops nga ipakita ang anda business name kag accreditation certificate imaw kang mga taripa sa pagpanukot para may basehan ang mga konsumidor. (AGP/PSM/PIA Antique kaimaw ang mga balita halin kanday KVC/AVS)
