ILIGAN CITY (PIA)–Gipaduol sa mga ahensya sa gobyerno ug pribadong sektor ang nagkadaiyang serbisyo ug programa ngadto sa mga residente sa Barangay Mandulog, usa ka hilit nga barangay ning dakbayan.
Gipaila sa Department of Labor and Employment (DOLE) Lanao del Norte ang Tulong Panghanapbuhay sa Ating Disadvantaged/Displaced Workers) ug DOLE Integrated Livelihood Program nga maoy mga flagship programs sa gobyerno nga gidesinyo sa pagsulbad sa unemployment ug paghatag og panginabuhian sa mga marginalized sector.
Gilusad sab sa Department of Information and Communications Technology (DICT) ang Free Wifi Program nga naghatag ug internet bandwidth sa barangay sa tabang sa Multifactors Sales nga naghatag sa access points. Gipaila usab sa DICT ang ubang mga programa sama sa social media marketing alang sa mga mag-uuma ug negosyante, ug pag-edukar sa mga residente sa cybersecurity awareness aron malikayan ang mga online scam.
Sa tabang sa internet, mas mapadali na ang pagparehistro sa mga negosyante sa ilang negosyo sa Department of Trade and Industry (DTI) nga ma-access na online. Magpahigayon sab ang St. Peter’s College og computer literacy training alang sa mga opisyal sa barangay, police personnel nga nadestino sa komunidad ug sa mga residente.
Komitado sab ang Iligan City Police Office Station 6 sa pagsiguro sa kalinaw ug kahapsay sa lugar. Nanagawan usab sila og suporta gikan sa komunidad aron makig-alayon kanila kung makamatikod sila og mga kadudahang kalihokan o indibidwal sa ilang palibot.
Mga residente sa Barangay Mandulog, Iligan City, nakabenepisyo sa lain-laing programa sa gobyerno ug pribadong sektor pinaagi sa Ronda Barangay. (ADD/PIA-10/Lanao del Norte)
Magpahigayon sab ang Livelihood and Entrepreneurial Agriculture Program in Iligan “Adopt a Farmer” program nga maghatag og suporta ug giya sa mga mag-uuma sa pagkat-on sa mga teknik sa agrikultura ug pagpadali sa ilang pag-access sa mga merkado.
Nakabenepisyo sab ang mga residente sa libreng check-up, tambal, cholesterol ug hemoglobin test gikan sa Eagles Pharmahealth.
Dugang pa, ang Mindanao State University-Iligan Institute of Technology WE CARE Extension Program magpahigayon usab ug pre-System Admission and Scholarship Examination review alang sa mga estudyante nga nagtinguha nga magpa-enrol sa unibersidad.
Dako ang pasalamat sa mga residente sa lain-laing serbisyo ug programa nga gitanyag sa ilang komunidad.
Alang kang Hermalyn Paran, makatabang ang libreng Wi-Fi access sa pagkonekta sa mga paryente ug para sa edukasyon sa ilang mga anak.
“Napakalaking pasasalamat ko sa inyo dahil sa inyong tulong na makakatulong sa amin, lalo na sa mga estudyanteng walang sapat na kakayahan. Isang magandang tulong ito para sa amin, sumala ni Saima Yusof.
Gipasiugda sa Iligan Chamber of Commerce and Industry Foundation, Inc. (CCIFII) ang “Ronda Barangay” uban sa mga ahensya sa gobyerno ug pribadong sektor nga maghatag og mga programa sa panglawas, edukasyon, technological access, agrikultura, ug business mentorship programs, ug uban pa.
“Kining Ronda Barangay, was conceptualized last year. Tungod sa paglibot-libot sa mga barangay, nakita nato ang mga kakulangon. Nauna jud ang hinterland barnangays kay sila ang underserved, unserved barangays ug layo kaayo sila,” sumala ni CCIFII President Reggie Punongbayan.
Dugang pa, ang CCIFII bag-o lang gihatagan og award isip Most Outstanding Chamber in Mindanao for City Level atol sa 49th Philippine Business Conference and Expo. (LELA/PIA-10/Lanao del Norte)
