LARENA, Siquijor (PIA) — Ang lungsod sa Larena malampusong nagpahigayon sa usa ka Socialization Event alang sa mga senior citizens atol usab sa pagsaulog sa panahon sa pasko.
Tumong sa maong kalihokan ang paglig-on sa komunidad nga adunay panaghiusa, kalipay, ug pagpasalamat sa kontribusyon sa mga katigulangan o edaran sa katilingban ilabi ba niining bulan sa pasko.
Daghang mga senior citizens ang mitambong ug mipakita sa ilang talento ug pagkamamugnaon pinaagi sa lain-laing mga presentasyon gikan sa ilang barangay sama sa sadya ug makapahinuklog nga mga kanta, maanindot nga mga sayaw, ug uban pang makalingaw nga pasundayag .
Aduna usab silay mga dalang mga nagkaraiyang lagmi nga mga pagkaon nga ilang giusahan ug gipaambit sa uban.
Napuno sa kalipay, katawa, ang matag-usa ug nakita ang tinuod nga panaghiusa nga nagpahinumdom sa matag usa kanato ng ang mga senior citizens importante ug aktibong kabahin sa katilingban.
Sa mga senior citizens nga young at heart, atong ibutang sa atong sa panumduman nga ang kahuyang sa lawas dili babag sa kalipay ug ang tinuod nga kusog magagikan sa maayong kasingkasing ug positibong panglantaw sa kinabuhi. (RAC/PIA7-Siquijor)
