SYUDAD SANG ILOILO (PIA) – Kalakip ang nagkalainlain nga mga serbisyo sang gobyerno sa ginpatigayon nga Nationwide Job Fair sa SM City Iloilo sa pagpanguna sang Department of Labor and Employment (DOLE) 6 kag Public Employment Service Office- Iloilo City.
Maluwas sa nagapanguna sini nga katuyuan nga maghatag sang mga oportunidad para makakita sang ubra, madamo nga mga aktibidad ang ginpatigayon kaupod ang iban nga mga ahensya sang gobyerno.
Kadungan sang job fair, ginpatigayon ang pagpanagtag sang livelihood assistance sa idalom sang DOLE Integrated Livelihood Program (DILP), DOLE Adjustments Measure Program (AMP), kag pagpirma sang kontrata kaupod ang Tulong Panghanapbuhay sa Ating Disadvantaged/Displaced Workers (TUPAD) emergency employment program nga mga benepisyaryo.
May yara man nga Kadiwa ng Pangulo nga nangin palaagyan para mabaligya sang mga lokal nga mga mangunguma kag prodyuser ang ila mga produkto.
Nagtukod man sang Help Desk nga gin-updan sang mga tiglawas gikan sa 16 ka mga ahensya sang gobyerno nga nagbulig sa mga kliyente sang ila mga kinahanglanon.
May kabug-osan 48 ka mga aplikante ang nangin hired on the spot (HOTS) kon sa diin direkta nga nakabenepisyo sa 1,768 job vacancies sang 21 ka kompanya nga nag-upod sa job fair.
Sa karon, padayon nga gina-monitor sang DOLE 6 ang estado sang 45 ka near hired applicants nga nagakinahanglan lang nga mag-comply sang iban nga mga requirements sang ila mga prospective nga employer.
Sa pihak nga bahin, may ginpanghatag man nga kabilogan nga P2.8 milyon nga livelihood assistance sa lima ka partner local government units nga ginatan-aw nga makabenepisyo sa 128 ka mga miyembro sang nagkalainlain nga mga asosasyon. Ang mga lokal nga panguluhan nga nakabaton sang mga proyekto amo ang Tobias Fornier, Antique para sa Cattle Fattening Project; Brgy. Sua kag Brgy. Tabas, San Dionisio para sa Iloilo Fishing Gears and Accessories; Brgy. San Roque, Estancia, Iloilo para sa Oyster Culture Project; kag Brgy. Zamora- Melliza, Iloilo City para sa Rice Retailing kag Carinderia.
May napulo naman ka medium enterprises nga nangin benepisyaryo sa idalom sang DOLE Adjustment Measures Program (DOLE-AMP) nga ginhatagan sang kabug-osan nga assistance nga P4.6 milyon para sa product development kag inobasyon, capacity building, kag business enhancement application.
Ginhiwat man ang TUPAD orientation kag contract signing sa banwa sang Leganes, Iloilo para sa 120 ka informal workers. Naglab-ot sa P667,080 ang ginpain para sa sweldo, personal protective equipment, kag group personal accident insurance para sa mga benepisyaryo.
Sa Kadiwa ng Pangulo (KNP) Fair naman, may anum ka Kabuhayan partners nga nagpakigbahin kag nagbaligya sang ila kalidad nga mga produkto kaangay sang bags nga buhat sa pandan kag buri leaves, mga woven products gikan sa hablon, mga preska nga farm products kag preserves, nga ginbaligya sa barato nga mga presyo.
Nagpartisipar man bilang resellers sa KNP ang 31 ka mga asosasyon nga ginabuligan sang Department of Agriculture, Department of Trade and Industry, Bureau of Fisheries and Aquatic Resources, kag National Irrigation Administration.
Ang kabilugan naman nga kita nga nakuha sang mga nagpartisipar nga mga asosasyon sa KNP naglab-ot sa P238,931.
Nagpanghatag man ang DA sang mga bulig pinansyal sa tatlo ka farmers’ association kag cooperatives kag transport logistic sa isa ka lokal nga panguluhan bilang kabahin sang KNP. (AAL/AGP/PIA 6 kalakip ang mga balita gikan sa DOLE 6)
