ILIGAN CITY (PIA) — Subay sa pagsaulog sa World Tuberculosis (TB) Day niadtong Marso 24, gilusad sa Iligan City Health Office (CHO), kauban ang Department of Health, ang ilang tinuig nga TB-HIV Mobile Caravan.
Ang maong caravan gahatag og libreng chest X-ray, Human immunodeficiency virus (HIV) testing ug counseling, konsultasyon sa doktor, ug tambal sa nagkalain-laing sektor.
Kauban sa mga benepisyaryo niini ang mga sikad driver, basurero, ug empleyado sa lokal nga kagamhanan nga kanunay nag-atubang sa publiko.
Sumala ni Dr. Ardel Castañeda-Padayhag, City Medical Coordinator sa National Tuberculosis Control Program sa CHO, dako ang natabang sa maong programa aron mapadali ang pagdiskobre ug pagtambal sa sakit.
“Sa una, magtago-tago sila. Karon, educated na sila. Na-aware na sila nga ang TB matambalan ug maayo, so they can go back sa usual nilang work schedule,” sumala niya.
Sa usa ka screening nga gihimo sa Barangay Suarez niadtong Marso 15, 20 sa 100 ka indibidwal nga gipailawom sa test ang nagpositibo sa TB. Apan, giklaro ni Padayhag nga nakadawat og libre nga tambal ang mga nagpositibo, ug dako ang suporta sa lokal nga pangagamhanan sa programa sa TB, hinungdan sa pagkunhod sa kaso.
Gidasig usab niya ang publiko nga adunay mga sintomas sama sa dugay nga ubo nga molungtad og duha ka semana o labaw pa, hilanat, sakit sa likod, pagkawala sa gana sa pagkaon, ug pagniwang, nga moadto sa ilang duol nga health center alang sa sayong diagnosis ug pagtambal.
Gipahinumduman usab niya ang mga pasyenteng nagpa-tambal nga tiwason ang ilang tambal aron hingpit nga matangtang ang impeksyon ug malikayan ang pagkatakod niini.
Samtang, mapasalamaton ang mga sikad driver sa libreng check-up nga ilang nadawat.
“Magpasalamat ko kay naay libreng check-up. Gusto nako mihibaw-an kung unsa ang resulta. Dako kaayo ni nga tabang sa amoa,” matod ni Jimmy Lucot, nga nagsugod isip sikad driver niadtong 2017.
Si Eduard Ballesteros, usa ka sikad driver sukad 2011, malipayon usab sa programa ug nagpa-check-up tungod sa iyang balik-balik nga ubo.
Ang mobile caravan magapadayon sulod sa usa ka semana sugod sa Marso 24 alang sa Saray Sikad Association ug mga empleyado sa City Social Work and Development Office; sa Marso 25 alang sa mga empleyado sa City Environment and Management Office; sa Marso 26 alang sa Tubod Sikad Association ug sa mga empleyado sa City General Services Office employees; sa Marso 27 alang sa Tibanga Sikad Association ug Santiago Sikad Association; ug magtapos sa Marso 28 alang sa Villaverde Sikad Association ug sa mga empleyado sa City Health Office. (LELA/PIA-10/Lanao del Norte)
