SYUDAD SANG ILOILO — Ginpangalanan sang Civil Service Commission (CSC) ang pila sa mga empleyado sang gobyerno sa syudad kag probinsya sang Iloilo kag Guimaras angot sa Presidential Lingkod Bayan, Dangal ng Bayan, kag CSC Pagasa Awards.
Nalakip sa tatlo sa mga semi-finalists para sa 2024 Search for Outstanding Government workers amo sanday Wilson A. Batislaon, Municipal Government Department Head I sang banwa sang Leganes, Ann Rapunzel O. Ganzon, Social Welfare Officer IV sang gobyerno probinsyal kag Abner C. Zamora, Jail Superintendent sang Bureau of Jail Management and Penology (BJMP) – Iloilo City.
Ginpanginbulahan man ang mga regional winners sa indibidwal nga kategoriya sang Presidential Lingkod Bayan Award nga ginbug-usan nanday Dr. Joselito Villaruz, SUC President IV sang West Visayas State University, Mayor Stephen Palmares sang Passi City, Dr. Ildefonso Toledo, hepe sang Provincial Agriculture Office, Ann Rapunzel Ganzon kag Wilson Batislaon.
Suno sa CSC, ang Presidential Lingkod Bayan Award nagakilala sa mga indibidwal ukon grupo nga may pinasahi nga kontribusyon nga may yara sang dako nga epekto sa interes sang publiko, seguridad kag patrimonya.
Sa pihak nga bahin, nalakip man sa regional winners sang CSC Pagasa Award sanday Leila Valencia, Education Program Supervisor sang Department of Education Schools Division of Iloilo City, Lira Ladigohon, hepe sang Passi City – CDRRMO, kag Armida Tabaosares, School Principal II, Catalino G. Nava Farm School, Department of Education Schools Division of Guimaras.
Kabahin man sa ini nga pagkilala sa group category ang Uswag Iloilo City Molecular Laboratory sang Iloilo City Health Office.
Ang CSC Pagasa Award nagahatag pagtamod sa mga inbidwal ukon grupo nga may dako nga pakigbahin sa paghatag benepisyo sa masobra isa ka departamento sang gobyerno.
Para naman sa regional winners sa Dangal ng Bayan Award, ginabug-usan ini nanday Dr. Annabelle Tang, Iloilo City Health Officer, Ma. Ellen Jane Sibag sang Department of the Interior and Local Government-Iloilo kag anay director sang Iloilo City Police Office PCol. Joeresty Coronica.
Ang tagdaog sang Dangal ng Bayan Award nagakilala sa indibidwal nga may pinasahi nga ginhimo tuhoy sa serbisyo publiko kag nagapakita sang maayo nga ehemplo kag etikal nga pamatasan suno sa Republic Act 6713 ukon ang Code of Conduct and Ethical Standards for Public Officials and Employees. (AAL/LMLE/PIA)
