SYUDAD SANG ROXAS, Capiz (PIA) — Ginhimos na sang mga kandidato ang ila tagsa ka mga poster, tarpaulin kag iban pa nga mga kagamitan sa pagkampanya para sa natapos na nga Mayo 12 nga pinilian bilang pagsunod sa direktiba sang Commission on Elections.
Kaangot sini, nakakuha sang pagtalupangod ang inisyatibo sang liwat napilian bilang Konsehal nga si Fernando Luis “Bords” Viterbo sang Roxas City matapos nga ginpa recycle sini ang iya mga tarpaulin agud mahimo nga bag sa bulig sang isa ka lokal nga upholstery shop.
“Ang akon campaign tarps ginpanghimos na namon kag gin convert into bags para ma repurpose kag mangin environmental[ly] responsible kita. Maka bulig pa kita sa mga local upholstery shops. Ini mga bags ipang hatag namon for free,” ang pahayag ni Viterbo sa iya Facebook post.
Samtang ang inisyatibo ang gindayaw naman sang mga kakilala sang konsehal kalakip ni Attorney Emilyn Depon nga anay hepe sang Capiz Provincial Environment and Natural Resources (CaPENRO) pinaagi sa pagpahayag nga dapat pamarisan ang pag-amlig sa palibot.
Nahibaluan nga ang CaPENRO ang nagpahanumdom man sa mga kandidato nga ila himuson, bahin-bahinon, mag-recycle kag mahimo magdonar sa mga organisasyon nga makahibalo mag “repurpose” sang mga campaign materials.
Ang kampanya para sa responsable nga paghimos sang mga poster, tarpaulin kag iban pa nga mga kagamitan sa pagpakilala sang mga kandidato ang nagatuyo nga malikawan ang paglinapta sang mga ini nga mangin kabangdanan sang mahigko nga palibot, pagbara sang mga alagyan sang tubig kag magadugang problema sa basura. (AGP/AAL/PIA Capiz/Cover photo halin sa FB Page ni Konsehal Viterbo)
