TAGBILARAN CITY, Bohol (PIA)—Gituman na sa PetroGreen Energy Development Corporation (PGEDC) ugsa Dagohoy Green Energy Corporation ang saad niini nga mahatag og libre nga mga pagbansay sa mga npangpubliko nga mga magtutudlo sa Dagohoy Division.
Kahinumduman nga lakip sa mga kasabutan sa Dagohoy Local Government Unit sa pagtugot niini nga makatukod ang PGEDC ug sa anak niining korporasyon nga DGEC sa 22 ka ektarya nga luna sa 27.5 mega watts nga solar photovoltaic power aron makadugang sa suplay sa koryente sa Kabisay-an, nga mohatag ang kompanya sa mga scholarship sa mga kabus nga estudyanteng angayan tabangan, ug manghatag og libre nga bansaybansay alang sa mga magtutudlo sa Department of Education sa Dagohoy Division.
Didto sa Panda Tea Garden Suites, 95 ka mga magtutudlo sa Dagohoy District gikan sa walo ka tunghaan sa lungsod ang gibansay sulod sa tulo ka adlaw nga libre.
Mismo mga eksperto sa pagtudlo ang gikuha sa PGEDC gikan sa kapartner niini nga Mapua Malayan Colleges sa Laguna ang nahidangat dinhi sa Bohol Julyo 3-5 alang sa pagbansaybansay.
Matud sa usa ka partisipante sa bansaybansay nga si Ryan Delbaguio, principal sa Dagohoy Central Elementary School, nga daku kaayong ikatabang kay pinaagi niini, mapalab-as sa mga magtutudlo ang Philippine Professional Standards for Teachers, ilabi na kay bisan sa una pa lamang nga adlaw, nakita na niya nga competent ang mga trainors.
Gitutokan nila sa training team ang pagpa-uswag sa katakus sa mga magtutudlo nga masolbad ang suliran sa readinga dn comprehension nga maoy nahimong sagabal sa edukasyon karon.
Nagpaabut kita nga ikapagawas ang mas daghan nga interbensyon kabahin sa pagbasa ug sa pagsabut sa mga tinun-an, segun usab sa suliran nga napagawas sa educational assessment sa sistema sa edukasyon sa nasud, matud niya.
“Ang bansay-bansay, nga giila nga TeachUp , us aka nag-una nga multi-stakeholder programa sa pagpataas sa kapasidad sa mga magtutudlo nga gitumong aron mapamaayo pa ang abilidad ug kinaiya sa mga titser aron pinaagi niini, mapaugmad usab ang sistema og kalidad sa pangpublikong edukasyon sa nasud,” pasabut ni assistant vice president for communications sa PGEDC Vanessa G. Peralta.
Ang tulo ka adlaw nga bansay sa mga magtutudlo, gitambongan sa 98 ka bag-o ug mga tenured nga mga magtutudlo sa DepEd Dagohoy.
“Nalipay kita nga sa katapusan, ato na nga ikapatuman ang lukop nga Teachers’ Upskilling Program dinhi sa Bohol Bohol. Human kini mapatuman sa Palawan, Batangas, Aklan, Tarlac, ug Davao,” dayag ni Yrel Ventura, ang assistant vice president for environment and community relations sa kompanya.
Sa kinatibuk-an, kapin na sa 2,00 ka mga magtutudlo sa public primary schools sa nasud ang nakasuway na sa bansaybansay ug ila na nga nagamit kini.
“Ang edukasyon may importante nga buhat sa paghulma sa kaugmaon sa mga komunidad, ug natuo kita nga pinaagi sa paghatag og dugang katakus sa atong mga magtutudlo, makapasugod kita sa mga kabag-ohan sa mga lugar diin nahimutang ang atong mga pasilidad,” dugang ni Ventura.
Ang bansaybansay, gitabangan sa mga pribadong kompanya, mga eskwelahan, ug mga local nga kagamhanan aron makapamaayo pa sa edukasyon ug mapadusi ang mas malungtaron nga pagkat-on dinhi sa nasud.
“Dili gyud gihapon kining bansaybansay molampus kon wala pay suporta gikan sa atong mga partner ug local nga mga liders sama ni Gov. Aris Aumentando ug Dagohoy Mayor Hermie Relampagos,” dugang ni Ventura. (RAHC/PIA Bohol)
