TAGBILARAN CITY, Bohol (PIA) — Gawas sa umento sa sweldo sa mga trabahante sa gobyerno, gipahibalo usab ni Presidente Ferdinand R. Marcos Jr. ang iyang pagtugot sa paghatag og medical allowance alang sa kapin sa usa ka milyon nga mga kawani sa gobyerno sa nasud.
“Para naman sa ating mga kawani ng gobyerno, mayroon silang maaasahang medical allowance bilang karagdagang benepisyo sa susunod na taon,” gibutyag sa Presidente sa iyang ikatulo nga State of the Nation Address (SONA).
Sugod sa 2025, ang mga trabahante sa gobyerno makadawat matag usa og medical allowance isip subsidy alang sa pag-avail sa mga benepisyo sa Health Maintenance Organization (HMO) o HMO-type nga benepisyo.
Ang medikal nga allowance mahimong magamit alang sa lainlaing mga serbisyo sa medikal, pagtabang sa mga empleyado sa publiko nga maandam alang sa bisan unsang mga emerhensya nga may kalabotan sa kahimsog.
Alang sa pagpatuman niini, adunay kinatibuk-ang ₱9.5 bilyon ang gigahin ubos sa Miscellaneous Personnel Benefits Fund (MBPF) alang sa 2025.
Kini naglangkob sa mga empleyado ubos sa National Government Agencies, State Universities and Colleges, ug Government-owned or -controlled Corporations sa Executive Department.
Kini nga medical allowance gilantaw nga subsidy o ayuda aron mas barato alang sa mga empleyado sa gobyerno ang mas maayong serbisyong medikal o benepisyo. (ECB/PIA7-Bohol)
