SYUDAD SANG ILOILO (PIA) — Nakabaton sang P1.8 million nga subsidy ang tanan nga tribu nga naga-intra sa Dinagyang Tribes competition subong nga tuig halin sa Iloilo Festivals Foundation Inc. bilang preparasyon sa highlight sang Dinagyang Festival sa Enero 26, 2025.
Ginpahayag ni IFFI president Allan Ryan Tan nga gindugangan nila ang subsidiya sang walo ka mga nagapasakop nga mga grupo sa P1.8 milyones sini nga tuig gikan sa P1.4 milyones sang 2024.
Padayon naman ang preparasyon sang Iloilo City government kag sang IFFI para sa selebrasyon nga nagsugod na sa opening salvo sang Kasadyahan sa Kabanwahanan kag sang Dinagyang sang Enero 9 kag 10, kun sa diin ang mga nagapasakop nga mga tribu gikan sa duha ka cultural events naghatag sang sneak peak sang ila performances nga natalana sa Enero 25 kag 26.
Ang walo ka teams nga nagapasakop para sa Dinagyang Tribes competition ang ang defending champion nga Tribu Pan-ay sang Fort San Pedro National High School, Tribu Paghidaet (La Paz NHS), Tribu Salognon (Jaro NHS), Tribu Parianon (Iloilo City NHS), Tribu Ilonganon (Jalandoni Memorial NHS), Tribu Hangaway (Graciano Lopez Jaena ES), Tribu Pag-asa kang Manduryaw (Mandurriao NHS), kag Tribu Molave (Barangay San Rafael, Mandurriao).
Samtang ang siyam ka mga munisipalidad nga nagapasakop sa Kasadyahan sa Kabanwahanan sini nga tuig ang ginalakipan sang Cabatuan (Tinuom Festival); Leon (Kaing Festival); Maasin (Tultugan Festival); Igbaras (Tangyan Festival); Anilao (Banaag Festival); New Lucena (Cry of Jelicuon Festival); kag San Rafael (Tawili Festival). Nakabaton man ang kada grupo sang P2 milyones nga subsidy gikan sa gobyerno probinsyal.
Sa pihak nga bahin, bilang kabahin sang preparasyon para sa kaluwasan kag seguridad sang publiko sa tiun sang selebrasyon, natalana nga magdeploy ang Police Regional Office (PRO)-6 sang 2,000 ka mga security personnel para sa kalawigon sang kapistahan bangud padayon ang Iloilo City Police Office (ICPO) istoryahan upod sa mga organisador para sa dugang nga mga tikang sa seguridad agud masiguro ang luwas nga paghiwat sang mga kahiwatan.
Samtang ang mga tiket para sa 2025 Dinagyang Festival kag Kasadyahan Festival competitions mahimo na nga mabakal online bangud sa bag-o nga ticketing system sa ginlunsar sang IFFI nga nagatuyo nga mangin mahapos para sa mga lokal, balikbayan, kag mga turista ang pagkuha sang pulungkuan para sa ginalauman nga mga cultural events. (AAL/JNH/PIA Iloilo)
