SYUDAD SANG ILOILO (PIA) — Nagpatigayon ang Mines and Geosciences Bureau Regional Office 6 (MGB 6) sang Department of Environment and Natural Resources (DENR) sang lecture natuhoy sa mga geologic hazard sa kapin 275 ka mga senior high school nga estudyante sang John B. Lacson Foundation Maritime University (Arevalo) Inc. sining damlag lang.
Gintawag “Pahanumdom: Senior High School DRRR Talk Series nga may tema ‘Empowering the Next Generation for a Resilient Future’, kabahin ining learning event sang padayon nga adbokasiya sang JBLFMU (Arevalo) Inc. agud mapalapnag ang ihibalo kag kahandaan sang mga estudyante may kaangtanan sa Disaster Readiness and Risk Reduction (DRRR).
Suno kay school administrator Mr. Robert O. Parcia, MSMM, sa iya mensahe “The best defense is awareness and preparedness in the face of natural calamities. It’s not just about being resilient but being prepared.”
Gindugang man sini nga ang aktibidad ang nagakapanahon kung i-kunsiderar nga ini ang panahon sang tuig nga maeksperyensyahan ang madamo ang bagyo.
Gin-agda sang JBLFMU (Arevalo) ang MGB 6 nga maghatag sang lecture natuhoy sa geologic hazards agud hatagan ang mga estudyante sang mas madalum nga paghangop sang importansya sang disaster risk reduction, kahandaan, pagresponder, partikular sang konteksto sang environmental hazards kasubong sang geologic hazards.
Isa sa mga resource person amo si MGB 6 supervising geologist Dr. Leilanie O. Suerte nga ginkuha ang interes sang mga senior high school student sa iya presentasyon “Understanding Geology and Geologic Hazards.”
Gintalakay ni Suerte ang nagkalainlain nga tipo sang landslides kag baha partikular ang dala sang mamunog nga ulan. Gin-athag man sini ang triggering mechanisms, contributing factors kag mga pamaagi agud matapna ang kalalat-an nga magluntad, malab-ot ang zero casualties kag mapahaganhagan ang negatibo nga impact sa palibot, infrastraktura kag palangabuhian.
Ginpresentar man sini ang National Geohazard Assessment and Mapping Program sang DENR kag MGB. Suno kay Suerte ang nahibaluan natuhoy sa geologic hazards kag mapa mapuslanon sa paghimo sang desisyon sa diin magtukod sang balay, dalan kag negosyo.
Ginpakigbahin man ni Suerte ang isa ka success story sa tion sang nagligad nga hitabo sang landslide sa isa ka banwa sang Iloilo sa diin ang kabuhi naluwas bangud sang ihibalo sa proneness sang lokalidad sa landslide gani wala sang casualties waay sapayan sang kahalitan sa mga balay kag bangud sang timely kag well-managed nga evacuation.
Isa man sa topiko nga gintalakay ni Adeline Grace M. Torreda, MGB 6 supervising geologist, amo ang coastal geologic hazards. (AAL/LAF/PIA6-Iloilo/MGB VI)
