SYUDAD SANG ILOILO (PIA) — Kabilogan nga 18 ka mga technical staff sang Mines and Geosciences Bureau Regional Office 6 (MGB 6) ang nagpaidalum sa isa ka paghanas natuhoy sa drone pilot kag mapping.
Ini nga mga technical staff ang naghalin sa geosciences division, mine management division, mine safety, environmental kag social development division sang ahensya.
Ginpasakopan man ang paghanas sang lima ka mga estudyante nagikan sa Negros Oriental State University (NORSU) nga nagapaidalum sa ila on-the-job-training sa MGB 6 sadtong Agosto 5 tubtub 6 sini nga tuig.
Ginpahayag ni MGB 6 supervising geologist Myron Gerard Y. De Guzman nga nagserbe nga resource speaker sa tion sang paghanas nga gindisenyo ang ini nga aktibidad agud mahatagan ang mga pumalasakop sang kinaalam kag kasampat sa epektibo kag luwas nga pag-usar sang drone.
Suno kay De Guzman ang drone, kilala man bilang unmanned aerial vehicle (UAV), ang madasig nga nagalapnag na sa karon sa mga nanuhaytuhay nga industriya kalakip ang photography kag videography, agriculture, mining, engineering, mapping, surveying kag disaster response.
Mahimo man magamit ang drone sa mga programa sang Mines and Geosciences Bureau kasubong sang geohazard mapping, geologic mapping, monitoring sang mina kag mga quarry operation.
Naglawig ang paghanas sang duha ka adlaw nga ginabug-usan sang lecture kag hands-on kung paano mag-operate sang drone, pagpatigayon sang drone survey kag mapping gamit ang drone nga may image analysis.
Kalabanan sa mga pumalasakop ang nakahimo sa ila kaugalingon nga orthomosaic images, digital surface models kag digital terrain models base sa naga-exister nga drone images pagkatapos sang paghanas. (AAL/LAF/PIA6-Iloilo/MGB 6)
