DAVAO CITY (PIA)– Ang pagselebrar sa usa ka semana nga Mindanao week of Peace karong tuiga uban sa temang, “Ang pagmintinar sa mga nakab-ot sa Kalinaw, Panaghiusa ug Kalig-on” pinaagi sa nagkalain-laing mga hagit, nagtumong nga mahimong ehemplo sa pagsuporta sa kalinaw, panaghiusa ug kalig-on sa Pilipinas taliwala sa komplikado ug mitumaw nga kagubot sa nasud.
Matod ni Fr. Pedro Lamata, director sa Archdiocesan Center for Ecumenical and Inter-religious Dialogue o ACEID Archdiocese of Davao, ang panagbangi sa Moro maoy usa sa pinakataas nga panagbangi sa Pilipinas, nga naglambigit sa Muslim separatist groups sa Mindanao.
Bisan pa sa dakong milestone sa komprehensibong kasabotan sa Bangsamoro o ang Comprehesive Agreement on Bangsamoro (CAB) ug sa pagmugna sa Bangsamoro Autonomous Region in Muslim Mindanao o BARMM, nagpabilin ang dakung hagit sa pagsiguro sa long-term nga kalinaw ug kauswagan sa rehiyon.
Gidugang ni Fr Lamata nga ang pagsulbad sa mga nagpahiping mga isyu sama sa kakabos, dili pagkakapareho, ug ang maayong pagdumala hinungdanon isip mga susi alang sa dugay nga kalig-on sa usa ka nasud.
Kini naghatag og gibug-aton sa kamahinungdanon sa pa papel ug pag-apil sa daghang mga stakeholder, lakip na ang gobyerno, lokal nga komunidad, non-government nga organisasyon ug internasyonal nga mga kauban.
Ang Mindanao Week of Peace opisyal nga ginahimo pinaagi Proclamation No. 127 nga gipagawas niadtong Nobyembre 26, 2001. Usa kini ka tinuig nga selebrasyon nga nagtumong sa pagpalambo sa kalinaw, panag-uyon, ug pagsinabtanay sa lain-laing mga komunidad sa Mindanao.(eti)
