SYUDAD SANG ILOILO (PIA) – Ginkoronahan bilang Miss Iloilo 2025 ang representante sang Maasin, Ilolo nga si Nicole Piccio sa ginhiwat nga coronation night sang Enero 11, 2025 sa West Visayas State Univeristy Cultural Center.
Magluwas sa titulo, nakuha man sang 27-anyos nga si Piccio ang awards sa Introduction Video, Advocacy and Tourism Video, Runway Model, Best in Gastronomy Costume, kag Best in Closed-Door Interview.
Mismo si reigning Miss Philippines-Eco International Alexie Mae Brooks ang nagkorona kay Piccio bilang iya successor sa Miss Iloilo.
Si Piccio ang ginakabig naman nga pageant veteran kun sa diin ginkoronahan naman ini bilang Miss Eco-Tourism Philippines 2019 kag Miss Manila: Woman of Wonder 2023 first runner-up.
Sa iya mensahe, ginpasalamatan man ni Piccio ang iya pamilya kag tanan nga naghatag suporta sa iya pag-intra sa Miss Iloilo.
“I feel very humbled and so loved. Dear Iloilo, ipabugal ta gid ka. I promise to make you proud,” dugang pa sang artist-beauty queen.
Magluwas kay Piccio, ginkilala naman nga Miss Iloilo Heartfelt Queens si Rhean Marissa Puyong sang Passi City nga gingawaran man sang Best in Swimsuit award, kag Elaine Segura sang Guimbal, Iloilo nga nakakuha man sang Best in Evening Gown. (AAL/JNH/PIA Iloilo)
