SYUDAD SANG ROXAS, Capiz (PIA) — Nagapadayon sa pagsebisyo sa komunidad ang Dali, Mabasa Kita: Mobile Library Program sang Capiz Provincial Library (CPL) kag Book Nook pinaagi sa pagbisita sa mga eskwelahan kag mga kabanwahanan sang probinsya.
Suno kay Renarey Aguihap, provincial library-in-charge sang CPL, nga nag-umpisa ang mobile library program sang pandemic nga may tinutuyo nga dal-on ang mga libro sa komunidad ilabi na gid sa mga benepisyaryo nga may mga limitado nga access sa mga libro.
Ginpahayag man ni Aguihap nga nadugangan ang mga libro sang CPL pinaagi sa bulig sang Book Nook Project sang National Book Development Board (NBDB).
“Sa subong, nagalab-ot na sa 1,000 ka Filipino-authored nga mga libro nga nagatib-ong sang mga pinasahi nga istorya kag Filipino values ang ginagamit namon sa mobile library program,” dugang ni Aguihap.
Suno kay Aguihap, bukas gid ang mobile library para sa tanan sa komunidad kag LGUs nga magabaton sa ila.
Nagkalainlain man ang klase sang libro nga gindala sang Mobile Library Program kapareho sang children’s books, Filipiniana, kag mga libro nahanungod sa history, nga nagaabot sa mga malayo nga bahin sang komunidad.
Dugang pa sini, isa sa ila mga target amo nga makahatag sang oportunidad para sa mga Persons Deprived of Liberty (PDL) nga makabasa.
“Ang mobile library wala sang fix nga schedule, hindi monthly, kundi kung may event lang nga pwede kami maka-sulod sa mga eskwelahan,” ginpabutyag sang provincial library-in-charge.
Dugang pa gid ni Aguihap nga naka-bisita na sila sa Don Jose Acevedo Integrated School sang Nobyembre 11, nga naka-serbisyo sa 261 ka mga elementarya kag senior high school students, bilang kabahin sang selebrasyon sang National Children’s Month, Filipino Values Month, kag Library and Information Services Month.
Ginpahayag man ni Aguihap nga sa sini nga bulan, may apat pa ka eskwelahan sa probinsya nga ila pagabisitahan. (AGP/PLF/PIA Capiz)
