SAN JOSE, Antique (PIA) — Ginapamaan kang Philippine Statistics Authority (PSA) nga dapat batunon ang nanari-sari nga format kang National ID sa mga pribado kag pampubliko nga transaksyon.
Hugot ang pagpahanumdom kang PSA sa publiko kag sa tanan nga nagagamit kang Philippine Identification System (PhilSys) nga batunon ang tanan nga sahi kang National ID, parehas kang National ID card, ePhilID, kag ang pinakabag-o nga Digital National ID.
Sa ginhiwat nga “Kapihan sa Bagong Pilipinas” forum kang nagligad nga semana, gintugruan igtalopangod ni PSA-6 OIC Regional Director Nelida Amolar ang paggamit kag pagbaton kang National ID bilang pruweba kang pagkakilanlan.
Dapat lang gid batunon sa mga lehitimo nga transaksyon ang National ID, hambal ni Amolar, kay dya napaidalom sa Republic Act (RA) 11055 ukon ang Philippine Identification System Act.
Para sa mga bangko kag iban pa nga establisyemento nga wara ginabaton ang National ID, ginhambal kang opisyal nga may ginpaguwa nga memoranda ang Bangko Sentral ng Pilipinas (BSP) nga dya dapat kilalanon sa mga transaksyon.
Samtang ginahulat kang mga pumuluyo ang pag-abot kang andang National ID card, pwede man makabuol kang ePhilID, nga may pareho nga gamit sa physical National ID, halin sa mga opisina kang PSA.
Dugang pa sa National ID card kag ePhilID, pwede man maproseso kang mga indibidwal nga narehistro sa PhilSys ang andang Digital National ID paagi sa website address nga https://national-id.gov.ph.
Paagi sa Digital National ID, nga sangka inisyatibo kang PSA kag Department of Information and Communications Technology (DICT), mas mapadasig ang pagtagtag kag paggamit kang National ID sa bilog nga pungsod. (AGP/BPS/PIA Antique)
