SYUDAD SANG ILOILO (PIA) — Ginlatag sang Department of Agriculture Western Visayas (DA-WV) ang nagkalainlain nga mga aktibidad kaangot sa selebrasyon sang National Rice Awareness Month (NRAM) subong nga bulan sang Nobyembre.
Ang mga aktibidad nasandig sa pagpalig-on sang responsable nga pagkonsumo sang kan-on sa idalom sang “Be RICEponsible” nga kampanya sang DA.
Nag-umpisa ang mga aktibidad para sa NRAM sang Nobyembre 5, 2024 sa Western Visayas Integrated Agricultural Research Center (WESVIARC) sa Jaro, Iloilo City kon sa diin kaupod nga gintigayon ang Rice Technical Caravan, “Pinasarap na Kanin” Cooking Challenge, kag “Palay Alamin!” Quiz Bee. Ang mga nasambit nga mga aktibidad gindesenyo para hatagan importansya ang mensahe nga “A-Ba-Ka-Da” sang NRAM nga: Adlay, mais, saba, atbp. ay ihalo sa kanin, Brown rice ay kainin, Kanin ay huwag sayangin, and Dapat bigas ng Pilipinas ang bilhin.
Gindayaw ni DA Western Visayas Regional Technical Director Zarlina B. Cuello ang rice farmers sang rehiyon sa ila pagpursige sa padayon nga pagtanum sang humay sa pihak sang mga limitasyon kag pagpanghangkat halin sa produksyon tubtob sa pagpamaligya.
Ginhingyo man niya ang publiko nga suportahan ang lokal nga mga produkto nga bugas kag magkonsumo sang iban pa nga alternatibo pareho sang brown rice kag rice mixes. Ginhatagan man pagtamod ni Cuello ang importansya sang pagnubo sang rice wastage bilang pagrespeto sang pagpangabudlay sang mga mangunguma.
Sa isa ka pagpamulong-pumulong, ang mga partisipante nga mga mangunguma halin sa mga banwa sang Iloilo nakabaton sang updates tuhoy sa Masagana Rice Industry Development Program halin kay Ian Calibara sang DA, kaupod man ang mga impormasyon sa rice crop insurance nga ginhatag nanday Regional Manager Eva Ulie Laud kag Jose Ma. Torres sang Philippine Crop Insurance Corporation, kag impormasyon sa palay procurement program sang National Food Authority 6 paagi kay Regional Manager Herielle Jumagbas.
Suno naman kay DA Western Visayas’ Regional Information Officer James Earl Ogatis, ang “Half-Cup Full Heart Challenge” sang Philippine Rice Research Institute naga-imbitar sa mga partisipante nga suportahan ang NRAM paagi sa pagkonsumo lamang sang tunga sa tasa nga kan-on kag pagpaambit sang ila mga eksperyensya sa Facebook para sa tsansa nga magdaug sang cash prizes nga nagalab-ot sa P40,000.
Ang iban pa nga mga aktibidad ginalakipan sang Be RICEponsible Facebook Reel kag Rice Photography Contests.
Ang Be RICEponsible Feeding Program naman pagahiwaton sa ti-on sang Dugong Bombo bloodletting event sa Iloilo Science and Technology University sa La Paz Campus sa Nobyembre 16.
Ang selebrasyon sang NRAM magatakop sa Nobyembre 29 sa Iloilo City paagi sa awarding ceremony kon sa diin pagakilalahon ang top rice producers sa rehiyon sa wet cropping season nga nangin benepisyaryo sang mga bulig halin sa DA sa idalom sang “Masagana Program.”
Ginaobserbahan kada tuig suno sa ginmandu sang Presidential Proclamation No. 524 series sang 2004, ang NRAM nagatinguha sa pagpasanyog sang rice self-sufficiency kag pagpasanyog sang ihibalo nahanungod sa responsable nga pagkonsumo sang bugas. (AAL/AGP/PIA6)
