SIQUIJOR, Siquijor (PIA) — Gisugdan ang kalihukan sa National Children’s Month nga gipasiugdahan sa Provincial Government of Siquijor, pinaagi sa Council for the Protection of Children (PCPC) sa Provincial Social Welfare and Development Office (PSWDO) niadtong Nobyembre 8 sa temang “Uswag Batang Siquijodnon, Paglaum sa Katilingban.”
Ang maong selebrasyon adunay nagkalain-laing aktibidades sama sa Color Fun Run, poster-making contest, ug Halad Serbisyo Para sa mga Batang Siquijodnon, diin adunay libreng alot, dental services, medical check-ups, blood, glucose, ug HIV tests, family planning, ug uban pang population development services.
Daghan ang nahimuot ug ubay-ubay usab ang miatender ug naka-avail sa Halad Serbisyo nga programa nga gihatag sa nagkalain-laining ahensiya sa gobyerno sama sa Department of Labor and Employment (DOLE), Philippine Statistics Authority (PSA) Siquijor, alang sa National ID registration ug late birth certificate registration, ug ang KADIWA kon Katuwang sa Diwa at Gawa para sa Masaganang Ani at Mataas na Kita services gikan sa Department of Agriculture, Department of the Interior and Local Government (DILG), Department of Trade and Industry (DTI), ug Office of the Provincial Agriculturist (OPA) aron pagpaabot sa ilang mga serbisyo.
Lakip usab sa Halad Serbisyo sa Katawhan mao ang pagpanghatag ug mga seedlings, utanon, vitamins, pagkaon ug pagpahigayon ug mga dula alang sa mga kabataan.
Si Siquijor board member Brylle Deeiah Tomarong Quio, Committee Chair on Social Services, mipasabot nga ang maayong pag-amuma ug pagtudlo sa matarong ngadto sa mga kabataan makahatag ug dakong kalamboan para sa maayong ugma sa atong probinsya .
Samtang si Department of Education (DepEd) Schools Division Superintendent Rosalie M. Pasaol mipaabot sa dakong pasalamat sa mga ginikanan ug magtutudlo sa ilang dakong suporta ug kooperasyon alang sa mga kabataan.
Dugang pang mga kalihukan alang sa National Childrens Month mao ang “Know Your Government Day” sa Nov. 12, Symposium ug Oratorical and Debate Contest sa Nov. 15, Feeding Program sa Nov. 18-23, Provincial Children’s Congress Presentation sa Nov. 20, Public Speaking Workshop sa Nov. 20-23, Orientation on the Local Code for Children and the Anti-Online Sexual Exploitation of Children (OSAEC) sa Nov. 26, ug Family Fun Day Culmination sa Nov. 27, 2024. (CAG/PIA7-Siquijor)
