SAN JOSE, Antique (PIA) — Ginselebrar kang probinsya kang Antique ang 2024 National Disability Rights Week (NDRW) kang nagligad gid lamang paagi sa sangka programa kag pagtipon-tipon kang mga tawo nga may kasablagan sa lawas.
Sa anang recorded nga mensahe bilang keynote speaker, gin-agda ni P3PWD Partylist representative kag abogada nga si Ma. Rowena E. Guanzon ang publiko nga padayon nga kilalanon kag protektaran ang kinamatarong kang mga persons with disability (PWD).
Ana gintugruan importansya ang mga inisyatibo kag lihok kang gobyerno sa pagsiguro kang inclusion kag equality sa sosyodad agud tanan may access sa mga oportunidad.
Samtang, ginpabutyag man ni Gov. Rhodora J. Cadiao ang anang suporta sa sektor kang mga PWD para masiguro ang kauswagan kang tanan nga mga Antiqueño, lakip ron ang mga tawo nga may kasablagan sa lawas.
Sa probinsya kang Antique, base sa datos kang Provincial Social Welfare and Development Office (PSWDO), may kapin 18,000 ka mga indibidwal ang narehistro bilang persons with disability.
Pira sa mga nagtambong nga PWDs sa aktibidad ang nakabaton man kang food packs kag talking watches para sa mga bulag nga estudyante.
Ang National Disability Rights Week (NDRW) ginaselebrar kada tuig halin Hulyo 17-23 para siguraduhon ang mga kinamatarong kang mga persons with disability kag pasanyugon ang accessibility kag equality sa sosyodad. (AGP/PSM/BPS/PIA Antique)
