BACOLOD CITY (PIA) — Nagabaton na sang mga kliyente ang tanan nga Civil Registration Service (CRS) sites sang Philippine Statistics Authority (PSA) sa Negros Occidental para sa national identification (ID) registration.
Ini sang nagbalik ang ila normal nga operasyon sang national ID registration, Enero 20, matapos ang madinalag-on nga pagpamaayo sang proseso sa pagrehistro agud mapasangkad ang ila serbisyo sa publiko.
Gin-agda ni Chief Statistical Specialist John F. Campomanes ang mga Negrense nga magrehistro para makabaton sang national ID nga isa ka valid nga pruweba sang pagkakilanlan sa mga pribado kag pampubliko nga transaksyon.
Para mag-enrol sa Philippine Identification System (PhilSys) Registry, kinahanglan lang mag-preparar sang bisan ano pero indi limitado sa mga ini: government-issued ID, Certificate of Live Birth, school ukon company ID, kag barangay clearance ukon certificate.
Sa Negros Occidental, ang national ID registration centers ginalakipan sang National ID Fixed Registration Center sa PSA Negros Occidental Provincial Statistical Office, Ayala Malls Capitol Central, Robinsons Place Bacolod, SM City Bacolod, Gaisano Grand Central, Gaisano Grand Silay, City Mall Victorias, kag City Mall Cadiz.
Mahimo man magrehistro sa mga local registrar’s offices kag local registration centers sa mga petsa nga igatanyag sang PSA.
Para man mas damo nga mga Negrense ang marehistro kag madala mas lapit sa katawhan ang serbisyo sang gobyerno, magahiwat liwat ang PSA sang mobile registration campaign sa mga malayo nga komunidad.
Nagapahanumdom ang PSA nga dapat batunon sa mga transaksyon ang tanan nga sahi sang national ID kaangay sang National ID card, ePhil ID, kag ang Digital National ID, bilang pagsunod sa Republic Act (RA) 11055 ukon ang Philippine Identification System Act. (AGP/BPS/PIA Negros Occidental/PSA Negros Occidental)
