SYUDAD SANG ILOILO (PIA) – Aprubado na sang National Wages and Productivity Commission (NWPC) ang pagsaka sang sweldo sang mga empleyado sang pribado nga sektor kag mga domestic workers sa Western Visayas.
Sandig sa Wage Order No. RBVI-28 sang Regional Tripartite Wages and Productivity Board (RTWPB)-6 sang Oktubre 22, 2024 may ara sang pagtaas nga P33 tubtob P40 sa inadlaw nga sweldo sang mga mamumugon nga nagatrabaho sa pribado nga sektor.
Sa idalom sang bag-o nga wage order, ang non-agricultural, industrial, kag commercial sectors nga may masobra sa 10 ka mga empleyado ang may ara sang P33 nga pagtaas sa ila minimum wage, kung sa diin ini ang mangin P513 na kada adlaw halin sa P480.
Sa mga manubo naman sa 10 ka empleyado, halin sa P450, may pagtaas sang P35 ukon P485 na ang bag-o nga wage rate.
Sa sektor sang agrikultura, halin sa P440, magataas ini sang P40, ukon P480 na ang sweldohanay.
Ginaprobahan man sang RTWPB-6 ang P1,000 nga monthly increase sa mga kasambahay sa rehiyon. Bangud sini, mangin P6,000 ang sweldohanay kada bulan halin sa P5,000.
Ang wage adjustment ang nadesisyunan matapos ang konsultasyon kag public hearing nga ginhiwat sang Regional Tripartite Wages and Productivity Board (RTWPB)-6, nga ginapangunahan ni Department of Labor and Employment (DOLE) 6 Director Atty. Sixto T. Rodriguez Jr., upod ang mga tiglawas nagikan sa gobyerno kag labor sectors.
Ang wage order ginsumiter sa NWPC sang Oktubre 28 kag igabalhag sa Nobyembre 1, kung sa diin ini maga-epekto sa Nobyembre 17.
Ginalauman nga makabenepisyo ang masobra 193 ka libo nga minimum wage earners kag makabenepisyo man indirectly ang masobra 300 ka libo nga full-time wage kag salary workers nga naga sweldo sang mataas sa minimum wage.
Sa kasambahay naman, ginalauman nga makabenepisyo sa bag-o nga wage increase ang masobra 160 ka libo ka domestic workers kon sa diin 31% ang yara sa live-in arrangements. (AAL/JNH/PIA Iloilo)
