Atol sa gipahigayon nga Kapihan sa PIA niadtong Feb. 19, si National Museum of the Philippines Cebu Information Officer III Ma. Cecilia B. Cabañes (right) mipaambit sa mga aktibidad nga pagahimuon sa National Museum of the Philippines kabahin sa kasaulogan sa 2025 National Arts Month. (RGC/PIA7 Cebu)
CEBU CITY, Cebu (PIA) – Ang National Museum of the Philippines (NMP) – Cebu midasig sa publiko ilabi na ngadto sa mga kabatan-onan sa pagduaw sa National Museum ug uban pang mga museum dinhi sa Cebu City.
Sa gipahigayon nga ‘Kapihan sa PIA’ program niadtong Feb. 19, giawhag ni NMP-Cebu Information Officer III Ma. Cecilia B. Cabañes ang publiko sa paggahin og panahon nga mobisita sa NMP og pagdangop sa mga aktibidad ug programa niini.
Isip kabahin sa kasaulogan sa ‘National Arts Month’ karong tuiga, ang NMP-Cebu magpatuman og mga nagkadaiyang programa og aktibidad nga magpasundayag sa kaanindot sa ‘arts’ og maghatag og mahinungdanong impormasyon kabahin sa mga art displays and exhibits sulod sa museo.
“Among gihangyo ang tanan sa pagbisita sa atong National Museum dinhi sa Cebu aron kamu makakat-on kabahin sa arts ug makahimamat sa mga arts displays and exhibits nga gama sa mga nagkalain-laing local artist. Giawhag usab namu ilabi natung mga batan-on nga mosalmot sa mga aktibidad nga among pagahimuon labot sa pag obserbar natu sa National Arts Month.” si Cabañes miingon.
Pipila niini mao ang pagpahigayon sa usa sa ilang flagship program, ang ‘Lala series’ nga magpasundayag sa mga lain-laing weaving traditions sa Cebu. Lakip usab sa mga aktibidad mao ang ‘print making workshop’ alang sa mga estudyante, musical presentation, museum engagement, ug uban pang mga interactive museum activities.
“For National Arts Month, NMP-Cebu is going to have a print making workshop karong umaabot February 24, so we will be inviting students to join us. We also have product demonstrations of the different weaving traditions we have here in Cebu” saysay ni Cabañes.
Magpahigayon usab og uban pang mga special public programs ang NMP-Cebu kung diin mag imbitar sila og mga local artists aron mopaambit sa ilang abilidad og kahanas ngadto sa mga tinun-an.
Matod ni Cabañes, nga ang museo nagsilbing usa ka alternative learning institution nga naghatag og kasayuran kabahin sa arts, culture, ug history sa usa ka lugar kung diin gawas nga malingaw sa mga art exhibits, makat-on usab sa kultura og tradisyon ang si kinsa nga mobisita sa national museum.
“When they visit the museum, they will learn a lot of things nga kanang beyond our books. Ang National Museum and all other museums serve as an alternative learning institution nga pwede natung maduaw. Daghan sad silag mahibaw-an nga mga knowledge about Cebu’s natural resources nga dili natu mabasa sa atong mga textbooks” si Cabañes midugang.
Matod pa nga anaa sa kapin usa ka libo ka mga indibidwal ang mobisita sa NMP-Cebu matag adlaw nga gilangkuban sa mga lokal og langyaw nga turista samtang kadaghanan niini mga estudyante ug batan-on.
Giklaro usab niya nga ang NMP-Cebu libre nga mabisita matag adlaw Lunes hangtod Domigo gikan sa alas 9 sa buntag hangtod 5 sa hapon.
Ang restoration sa NMP-Cebu nagsugod niatong 2018 ug kini opisyal nga giablihan niadtong tuig 2023 sa pagpangulo mismo ni Presidente Ferdinand Marcos Jr. (RGC/PIA7 Cebu)
