ILIGAN CITY (PIA)–Sa tumong nga magpromotar ang paglambo sa vocational training ug skills enhancement sa tibuok nasud, ang Technical Education and Skills Development Authority (TESDA)-Lanao del Norte mipahigayon sa National technical and vocational education and training (TVET) Enrollment Day sa Robinsons Place Iligan.
Baynte-sais ka mga technical-vocational schools ang naghiusa alang niini nga kalihokan, nga nagtumong sa paghatag ug kahanas og kahibalo sa mga indibidwal nga gikinahanglan nila aron makakuha og trabaho.
Tumong usab sa maong kalihokan nga i-promote ang TVET nga nag-awhag sa mga indibidwal nga magpa-enrol sa lain-laing mga kwalipikasyon ug scholarship sa TESDA.
“Ginaawhag namo ang gutong magpa-enrol sa mga qualifications sa TESDA so that pag na nay available nga scholarship, priority ang mga kaigsoonan nga nakapaenrol karong adalawa,” matud ni Norayah Acas, provincial director of TESDA Lanao del Norte.
Usa lamang si Marcelo Dangcalan sa mga nag-enrol sa maong aktibidad. Nagpa-enrol siya sa driving qualification. Mapasalamaton siya sa kahigayonan nga matagaan ug oportunidad na makatuon ug driving kung palaron.
Usa siya ka mananagat sa Linamon, Lanao del Norte, ug naglisod sa iyang pananagat kay matod niya dili kini makahatag og kasiguruduhan sa iyang adlaw-adlaw nga panginahanglan. Sumala niya, importante sab nga makatuon siya’g driving aron makatabang siya sa iyang mga silingan ilabi na sa panahon sa emerhensya.
“Salamat kaayo nga naa giheld ang TESDA dinhi, nag event. Dako kaayo ang tabang sa kinabahui inkaso madawat ko. Salamat kaayo sa TESDA. Usa mo sa makatabang sa pobre sa bukid,” matod niya.
Ang mga enrollees makadawat og mga abiso gikan sa Regional Training Center o technical-vocational schools kung aduna nay mga slots alang sa scholarship.
Pipila sa mga partners sa TESDA mao ang Athena Institute of Training and Assessment Inc., Saint Cajetan Institute of Technology Inc., Picardal Institute of Science and Technology, St. Laurence Institute of Technology, CRC Global Skills Institute, ug uban pa. (LELA/PIA-10/Lanao del Norte)
