Sa mga suliran sa rehiyon ilabi na sa nagkaparat nga tubig mainum, nakahigayon ang mga lider sa Central Visayas pamarayeg ni Pres. Ferdinand R. Marcos Jr., aron pinaagi sa iyang gahum ehekutibo, mahatagan og kahapsay ang nalambud nga mga pamaagi nga kinaingnan na hinuon sa kalisud sa katawhan. (PIA Bohol/Governor’s Office)
TAGBILARAN CITY, Bohol (PIA) — Sa nagkapaspas nga pagsurop sa parat nga tubig ngadto sa mga atabay ug mga tinubdan sa tubig sa Kabisay-an, gisugyot sa Regional Development Council 7 (RDC-7) ang aktibo nga presensya sa National Water Resources Board (NWRB) diha sa mga local nga kagamhanan, aron makamonitor kini sa nagsobra na nga mga water processing permit applications.
Kini usab samtang nagkadaghan na ang mga water processing plants nga nagbuho sa ilang kaugalingon nga mga atabay aron makabarato sa ilang operations sa paglanat sa mga katuigan.
Apan, kasagaran usab nga local government units (LGUs) nga kuhaan sa permit sa operations sa mga water processing, wala na magmonitor sa tinubdan sa tubig nga iproseso, kay kini, atua man nasangon sa NWRB.
Sa laing bahin, ang NWRB, walay igo nga kadaghanon sa tawo nga makahimo sa pagsubay sa mga nagkawot og mga atabay, ilabi na kay sagad nga kinaiya, moderecho na lang og kawot og tinubdan sa tubig tab-ang, kon ang pagkawot, naa sa sulod sa ilnga pribado nga mga luna.
Ang paspas nga pagsulod sa tubig-dagat ngadto sa mga atabay, epekto sa mas paspas ang pagbomba sa tubig tab-ang pagawas, nga dili na maapas sa kalikopan sa pagfilter sa tubig para tug sa gihunob gikan sa uwan.
Didto sa labing bag-o nga tigum sa RDC, nga tigum usab kauban si Presidente Ferdinand Marcos Jr., lakip sa mga isyu nga gipalutaw sa Central Visayas mao ang water supply.
Mismo ang syudad sa Sugbo ang makapamatuod sa suliran sa tubig-parat na ang makuha sa ilang mga atabay.
Dinhi sa Bohol, particular sa Panglao, nataho na usab ang susama nga suliran sa parat nga tubig.
Ang pag-inom sa tubig parat, gituohan nga maoy us aka dakung hinungdan sa pagkaporma sa bato sa kidneys ug nga suliran sa kidneys.
Didto usab sa RDC, samtang naminaw ang president, gipadayag usab sa konseho nga kon mmahimo, ang Office of the President na ang maghimo og executive action, aron mapalapad ang mga gimbuhaton sa NWRB, kahatagan sila og dugang pundo ug mga kahinguhaan aron mas mapalig-on pa ang mga satellite nga mga buhatan sa NWRB sa mga rehiyon. (RAHC/PIA Bohol)
