TACLOBAN CITY (PIA) — Gintatalinguha han National Bureau of Investigation (NBI) Regional Office ha Eastern Visayas nga maserbisyuhan an mas damo nga molupyo ipinaagi han pag-abre hin satellite offices ha magkalain-lain nga parte han rehiyon.
Durante han Kapihan sa Bagong Pilipinas, iginpahayag ni NBI regional director, Atty. Emeterio Dongallo Jr., nga pag-aabrehan an satellite offices ha Catarman, Northern Samar ngan Naval, Biliran temprano sunod nga tuig.
Ini in dugang han satellite offices ha Ormoc City; Calbayog City; Maasin City; Sogod, Southern Leyte; Dolores ngan Balangkayan, Eastern Samar.
Ginpahayag pa ni Director Dongallo nga ini nga satellite offices in andam maghatag hin magkadurudilain nga serbisyo han NBI sugad han intelligence, forensic, investigation, ngan legal services.
Abre gihapon an regional office ha Tacloban City ngan an district office hini ha Catbalogan City, Samar para han ira mga serbisyo. (RLA, PIA Eastern Visayas)
