Mga grupo kang tumandok nagpakita kang mapa ka anda lugar sa Valderrama, Antique. (Laragway: NCIP)
SAN JOSE, Antique (PIA) — Ang National Commission on Indigenous Peoples (NCIP) nagakalipay sa mga nabaton nga programa para sa mga tumandok sa probinsya kang Antique.
Ginpabutyag ni NCIP Community Affairs Officer I Charlen E. Panaguiton ang anang kalipay sa suporta nga ginatugro sa komunidad kang mga Indigenous People (IP) bilang katumanan sa probisyon kang Indigenous People’s Rights Act kang 1997 ukon IPRA.
Ang Antique may tatlo ka grupo kang mga tumandok nga amo ang komunidad kang mga Ati, Iraynon-Bukidnon, kag Cuyon-on nga makit-an sa nasari-sari nga munisipalidad sa probinsya lakip na ang Isla kang Caluya.
Suno kay Panaguiton, tungod sa IPRA Law, naghugpong ang mga ahensya kang gobyerno kag mga lokal nga opisyales agud suportahan ang komunidad kang tumandok.
Lakip man nga ginapasalamatan ang pagpatuman kang DepEd Order No. 62, nga nagapatuman kang National Indigenous Peoples Education Framework.
Dya nga polisiya nagpasanyog kang partisipasyon kang mga tumandok sa sistema kang edukasyon.
Tungod sa mga scholarship program kang gobyerno kag iban pa nga programa pang-edukasyon sa mga kabataan, masobra 75 porsyento ka mga kabataan sa anda komunidad ang naka-eskwela.
Si Panaguiton mismo, nga sangka tumadok, nagserbe nga simbolo kang paglaum sa anda komunidad. Gani, ginpangabay na ang mga kaimaw na nga tumandok nga hindi ikahuya ang andang kultura kundi anda dapat ipabugal.
Ana man ginbalita ang pag-angkon kang Certificate of Ancestral Domain Title (CADT) kang pira ka komunidad kang kang tumandok sa probinsya. (AGP/PSM/PIA Antique with reports from YPA/GIP/DOLE)
