SYUDAD SANG ILOILO (PIA) – Padayon nga ginatinguhaan sang National Dairy Authority (NDA) nga mapasanyog ang industriya sang gatas sa pungsod kag malab-ot ang 2.5 porsyento sini nga bastante nga suplay sa 2025.
Ginpahayag ni NDA administrator Atty. Marcus Antonius Andaya sa pagbukas sang National Dairy Summit sa syudad sang Iloilo nga kinahanglan ang bulig sang stakeholders sa industriya sang dairy agud masabat ang pila ka mga pagpanghangkat sa industriya, lakip na ang suplay sini, kung sa diin 99 porsyente sang kabug-usan nga 1.9 bilyon ka litro nga kinahanglanon nga gatas sang pungsod kada tuig ang ginakuha gikan sa iban nga mga pungsod.
“Every contribution and effort in this industry is vital. By combining our diverse expertise, we can create meaningful exchange and drive the industry forward. The NDA is hell-bent on doubling the milk sufficiency of the country by next year. While this increase may seem modest, it represents a groundbreaking achievement, the first substantial progress in dairy sufficiency in many years, if ever, occurring under the Marcos Jr. administration,” pahayag ni Andaya sa programa nga ginhiwat sa Iloilo Convention Center sang Oktubre 28, 2024.
Lakip sa mga plano sang NDA para malab-ot ang target kag mapalapit sa 5 porsyento nga sufficiency sa 2028 amu ang pagdugang sang panong paagi sa pag-import sang mga dairy.
Kinahanglan man nga pauswagon ang patubas paagi sa nagakaigo nga pagpakaon, nutrisyon, bulong, kag pag-atipan sa baka, suno sa NDA, kung sa diin ginpahayag man nila nga ang pagdugang sang panong kag patubas magaresulta sa mas maayo nga demand.
Luyag man sang NDA nga madugangan ang numero sang mga mangunguma sa industriya sang dairy kag maglunsar sang mas aktibo nga kampanya sa gatas.
Samtang, ginkilala naman ni Department of Agriculture secretary Francisco Tiu Laurel, Jr., sa iya mensahe nga ginpalab-ot ni undersecretary for Livestock Deogracias Victor Savellano, ang kontribusyon sang Western Visayas sa produksyon sang dairy sa pungsod, nga nagahatag sang kapin 2.2 milyones ka litro sang gatas kada tuig gikan sa panong sang 10,600 ka mga kasapatan.
“Our efforts will not cease until you see a thriving dairy industry in every province of Western Visayas. The progress of our farmers is the ultimate measure of our success,” siling ni Laurel.
Ang tatlo ka adlaw nga summit, nga magatapos sa Oktubre 30, 2024, gin-organisar sang Western Visayas Dairy Farmers and Stakeholders Agriventures Inc. (WVDFSAI), nga ginapangunahan sang ila chairman nga si Architect Johnny Que, sa pakig-upod sang NDA, Iloilo City Government, kag Iloilo Provincial Government.
Kapin 500 ka mga indibidwal ang nakipagbahin sa programa kung sa diin nakapakig-angot sila sa iban pa nga mga key player sa sektor sang gatas, kag nakatuon sang nagkalain-lain nga mga inobasyon sa agrikultura paagi sa mga eksibit.
Naangut sa tema nga “Pagpauswag sang DAIRYpreneurship, Innovation, Nutrition, Sustainability, and Food Security” ang summit kag nagatuyo nga mapakita ang pinakabag-o nga mga inobasyon, produkto, kag serbisyo sa industriya sang gatas. (AAL/JNH/PIA Iloilo)
