CEBU CITY, Cebu (PIA) — Ang National Economic and Development Authority (NEDA), uban sa Regional Development Council 7 (RDC 7), nag-awhag sa mga innovator sa Central Visayas sa pagsumite sa ilang mga proposals alang sa 2025 Filipinnovation Awards.
Ang Filipinnovation Awards, nga nailhan usab nga National and Regional Innovation Awards and Competitions (NRIAC), usa ka bag-ong inisyatibo sa NEDA nga nag-ila ug nagsuporta sa mga Filipino innovators nga naghimo og mga makapauswag nga kontribusyon sa nasudnong kalamboan.
Kini nga tinuig nga kompetisyon nagpasiugda sa early-stage commercialization, nag-promote sa inobasyon, nagkonektar sa mga innovator sa mga stakeholder, ug nagdani sa mga pamuhunan aron mapalambo ang kultura sa inobasyon sa Pilipinas.
Criteria sa kompetisyon
Aron mahimong kuwalipikado sa Filipinnovation Awards, ang mga aplikante kinahanglan mohaom sa mosunod nga mga critaeria:
- Filipino citizens o Filipino-owned enterprises;
- Innovators sa early-stage commercialization
- Rehistrado sa Department of Trade and Industry (DTI) o Securities and Exchange Commission (SEC); ug
- Adunay Certificate of Intellectual Property (IP) Registration o Proof of Ongoing IP Application.
Uban sa kompetisyon karong tuiga nga nagtutok sa tulo ka tema, lakip na ang Learning and Education, Health and Well-being, and Food and Agribusiness, ang kompetisyon gihan-ay sa duha ka hugna nga proseso.
Ang mga partisipante unang magtigi sa sub-national nga lebel, nga gibahin sa upat ka geographic cluster: National Capital Region (NCR), Luzon, Visayas, ug Mindanao.
Ang top 15 nga mga finalist gikan sa mga regional clusters magpadayon sa nasyonal nga entablado aron magtigi alang sa nasyonal nga pag-ila.
Lima ka mga mananaog ang pilion aron makadawat og lain-laing mga benepisyo, lakip na ang mga grant, mentorship, nasyonal nga pag-ila, partisipasyon sa mga internasyonal nga kalihokan, ug access sa mga investment opportunities aron masukod ang ilang mga inobasyon.
Unsaon pag-apply?
Step 1: Bisitaha ang web portal: filipinnovation.neda.gov.ph
Step 2: Magparehistro og account.
Step 3: Isumite ang aplikasyon.
Sa Marso 20, 2025 ang deadline sa mga pagsumite.
Mga inspiring innovator gi-awhag nga mo-apply og sayo aron mahimong bahin niining bag-ong inisyatibo.
Alang sa dugang kasayuran bahin sa Filipinnovation Awards, bisitaha ang https://filipinnovation.neda.gov.ph/ o https://www.facebook.com/NICfilipinnovation. (MSH/PIA 7 Cebu)
