DUMAGUETE CITY, Negros Oriental (PIA) – Giaprubahan sa mga miyembro sa Provincial Disaster Risk Reduction and Management Council (PDRRMC) ang pagpagawas og P42 million gikan sa Quick Response Fund (QRF) sa kagamahanan sa probinsiya alang sa mga nasalanta sa pag-alburuto sa bulkang Kanlaon.
Gibutyag ni Provincial Legal Officer Myles Bejar sa niaging PDRRMC meeting nga moabot sa P1 million ang magasto sa Lokal na Kagamhanan sa Canlaon City alang sa pagpakaon sa mga na-apektohan sa mga nagpuyo karon sa evacuation centers.
Adunay 859 ka pamilya o 2,373 ka mga indibidwal gikan sa mga barangay Pula, Malaiba, Linothangan, Lumapao, ug Masulog ang nagpuyo sa walo ka tunghaan sa siyudad nga gigamit isip evacuation centers.
Busa nihangyo na ang lokal na kagamhanan sa Canlaon City ug dugang tabang gikan sa probinsiya sa pagmanitinir sa operasyon sa mga evacuation site.
“There is so much expense in providing for the needs of the constituents of the city who are also the constituents of Negros Oriental,” matod ni Bejar.
(Daku kayo ang magasto paghulip sa mga panginahanglan sa mga molupyo sa syudad nga mga katawhan usab sa Negros Oriental.)
Nagsugod ang pag-gimok sa bulkan Kanlaon niadtong ika-9 sa Disyembre 2024 ug moabot na sa upat ka buwan ang pagpuyo sa mga apektado sa mga tunghaan nga gihimo nga evacuation centers.
Misapalamat si Canlaon City Public Information Officer Edna Lhou Masicampo sa tabang gikan sa PDRRMC.
Iyang giklaro na wala pa nila nadawat ang ayudang kwarta pero padayon ang koordinasyon sa ilahang city planning officer sa kagamahanan sa probinsiya alang sa pag-turn over sa maong kwarta.
Gibutyag sab niya na nagasto na sa ilahang lokal na kagamhanan ang ilang QRF nga naa sa P13,005,230 ug nagsalig na sila sa mga donasyon gikan sa lain pang mga ahensya og organisasyon aron mapondohan ang operasyon sa evacuation centers.
Ang tanan donation sa Canlaon City mabutang sa usa ka trust fund.
“Sa mga cash donation namo, ni-total siya og P35,987,927.69. Naa mi balance sa amoa trust fund nga P297,906.70 pero naa pa mi pending nga balayronon nga niabot og P1.3 million,” matod ni Masicampo.
Nakadawat sab og dugang pang P500,000 ang Canlaon City gikan sa Provincial Government of Bohol ug P2 million gikan sa City Government of Toledo sa niaging bulan.
Gigamit sa lokal nga kagamhanan sa Canlaon City ang kwarta sa pagpamalit og makaon alang sa mga na-apektohan, pag-ilis og suga sa mga classroom nga gigamit isip evacuation site, septic tank siphoning sa mga tunghaan ug bayad sa kuryente ug tubig sa mga evacuation center. (RAL/PIA7-Negros Oriental)
