Ang Negosyo Center counselor sa banwa kang Culasi, Antique nagabulig sa sangka aplikante nga naga-apply kang BN. (Litrato: DTI)
SAN JOSE, Antique (PIA) — Ang mga Negosyo Centers (NC) sa kabanwahanan kang Antique bukas sa pagbaton kang mga negosyante nga gusto magparehistro kang anda Business Name (BN).
Suno kay Department of Trade and Industry – Antique Trade and Development Specialist kag information officer Jenny May B. Tabalanza, ang mga NC counselors sa mga kabanwahanan handa magbulig sa mga katawhan nga nabudlayan magrehistro kang anda BN online.
Umpisa katong Agosto 2023, ang mga aplikante pwede run magbukas kang website nga www.bnrs.dti.gov.ph sa pagparehistro.
Tungod nga pwede run ang online registration, ang mga aplikante pwede mag-apply ka BN sa andang balay, opisina, ukon bisan diin man nga lugar nga may signal kang internet.
Suno sa record kang DTI kang nagligad nga tuig may kabilogan nga 4,762 BN ang narehistro para sa probinsya kang Antique.
Samtang, 1,951 ang narehistro paagi sa mga NCs kag 2,811 ang nagparehistro sa DTI Provincial Office online.
Suno sa Republic Act No. 3883, ukon “Business Name Law,” nga ginpasar katong Hunyo 18, 1963, tanan nga mga negosyo sa pungsod dapat magrehistro kang anang kaugalingon nga Business Name.
Ang tanan nga negosyo sa kabarangyan ginahinyu ka DTI nga magparehistro ka anda BN para mahapos ang anda pagtransaksyon kun kinahanglanun ang suporta kang gobyerno. (AGP/PSM/PIA Antique)
